【獨家】同王浩信車廂激咀忍唔住笑 張振朗唔想再拍裸跑戲

去年奪得「飛躍進步男藝員」嘅張振朗(Owen)受TVB力捧，告別「地獄黑仔王」之名。主演嘅新劇《反黑路人甲》中仲有好大發揮，除咗有唔少打鬥場面外，仲要犧牲色相裸跑兼要同王浩信有激咀戲。問到跟王浩信Kiss有咩感覺？最近同女友楊偲泳好Sweet嘅張振朗語帶雙關：「我好『正直』㗎。」採訪：方騫平 鞋履：HOAX

在《反黑路人甲》中飾演卧底嘅張振朗因為同王浩信第二次合作所以好有默契，「我哋同一個channel，都係『無聊』底，所以戲外經常會傾偈度啲新嘢出嚟。」Owen表示今次同王浩信hehe情昇華咗，拍親熱戲拍到忍唔住大笑。「我哋喺車廂入面有場狂風掃落葉式嘅咀對咀戲，我哋做咗好多唔同肢體動作，拍嗰陣我係完全忍唔到笑，因為當時我連佢呼吸同心跳聲都聽到，一聽到就覺得好想笑。」

做乜女友都咁支持
在劇中，張振朗要拍一場裸跑戲，當事人強調好難忘，仲唔希望拍第二次。而對於跟同性拍咀戲，他坦言較跟異性容易Handle啲，尤其同相熟演員拍攝，話嚟就嚟先冇咁尷尬。「連女友都好奇追問『場戲好唔好睇？』，套劇宗旨想觀眾睇得開心，喺疫情下笑返一晚經已好滿足，而我嘅演技，當然有進步空間啦！」張振朗最近迷上玩電單車，更花10幾萬添置咗部懷舊電單車享受男人的浪漫！他說：「揸住電單車去山旮旯地方周圍探索，係enjoy時刻，不過，喺好安全情況下，我先會載埋女友出發，始終電單車比較唔安全，但佢好鍾意我揸電單車，因為覺得好型。」