【無懼疫情】凌晨殺入西貢脫「罩」出海　陳偉琪陪男友人浪漫睇日出

「細龍太」陳偉琪（Vicky）一向熱愛運動，即使近日本土爆發第三波疫情，她都無懼染疫，一連兩日脫「罩」出海玩「SUP立式划槳」！繼前日凌晨5點，着住性感比堅尼划到海中心睇日出後，今晨4點幾Vicky又以超低胸一件頭殺入西貢，陪男友人Edmund玩SUP立式划槳，連對方都忍唔住拍片問她：「究竟係愛呀？定係責任呀？要你喺4點幾過嚟西貢同我一齊爬板呢？」風情萬種的Vicky撥一撥頭髮，然後向鏡頭高舉雙臂並高呼：「係好玩呀！」Well...相信冇愛都唔會咁「誠心」，一連兩日凌晨爬起身，仲要山長水遠入西貢玩水、睇日出囉，未知呢位Edmund係咪其新歡呢？

事後Vicky又於IG貼出靚相，兼留言發放正能量：「把一齊（切）的不好暈（運）、傷心、煩惱，拋諸腦後，準備迎接更好的一切！」