【獨家】眼濕濕取消10月紅館騷　梁漢文影完「踢波照」認疏忽

今年4月尾，梁漢文（Edmond）在網上拍片興奮宣佈將於10月31日至11月1日，舉行人生第5個紅館演唱會《梁漢文天天在家音樂會2020》，為以極Fit狀態開Show，呢兩個多月以來努力減肥及操肌，上月尾仲喺IG貼出6嚿腹肌照，開心晒成果！未料，有網友今日爆料指梁漢文已取消紅館演唱會兩日檔期，記者即翻查紅館《「普通訂租」待租用日期表》，的確發現10月31日至11月1日的檔期已轉為「待租用」。記者直接向梁漢文查詢，他獨家回應本報記者，指昨晚忍痛決定取消演唱會，「自己拍板一刻都唔開心，眼濕濕，我都冇晒心情。」問到取消跟那張引起好大迴響的「踢波照」是否有關?Edmond避談：「唔想諗，疫情真係好反覆。」並表示「冇諗過大家反應咁大，係我疏忽，令大家對我失望，我真係好簡單嘅人！」
採訪:方騫平、黎寶倫

直至晚上8時，梁漢文所屬經理人公司大岳娛樂發出通告，宣佈《梁漢文天天在家音樂會2020》延期舉行，而具體延期時間，將視乎疫情實際情況及相關政府部門落實通知後，再另行公佈。大岳娛樂發言人表示：「演唱會由決定進行至今，每日都千變萬化，延期舉行並不是新消息，早在5月中，因應場地座位安排，一直未能落實進場人數及座位距離如何處理，已經叫Edmond要有心理準備或會延期。6月底喜見疫情好轉，紅館一度宣佈可開放8成入座率，於是才決定進行影演唱會海報工作，影完海報，疫情又開始日漸嚴重，7月15日紅館閉館，何時再開，及如何發售座位等措施，又再有變，要有待開館才會有新通知。公司認為沒必要要公眾承擔買飛之後又再有變之不便，才決定延期。」

梁漢文接受電話訪問時透露，眼見近日本港疫情在社區持續爆發，他最終決定忍痛取消10月紅館騷，所以昨晚跟公司同事開會，公司方面都表示尊重他的決定，Edmond好無奈：「自己拍板一刻都唔開心、眼濕濕，我都冇晒心情，因為之前密鑼緊鼓，Fit唔Fit都係基本功，但今次演唱會好多嘢諗，個腦已經七勞八傷．本身諗住點都堅持住，但而家疫情走勢唔樂觀，加上進場人數、座位距離等安排太複雜，所以決定放棄。」不過，他稱今朝瞓醒已拋諸腦後並笑言：「唯有喺屋企唱畀太太聽囉，佢都好支持我。」


由於Edmond日前跟譚詠麟（阿倫）及葵青警區指揮官謝振中等踢波，事後阿倫於微博上載三人合照，結果惹來不少聲音，如今忽然宣佈演唱會取消，難免令人有所聯想！Edmond避談：「唔想諗，疫情真係好反覆，亦唔想喺咁多問題之間纏繞落去。」問到有否嬲阿倫？影完有否問過他可否Po上網？Edmond先說「冇問」，後尷尬支吾以對表示：「可能我聽唔到……但對我嚟講，真係簡單踢場波，冇諗咁多嘢。唉，人生係咁，今次當上一課。（學到咩？）學到對自己要再細心啲，我自己唔夠細心，真係好簡單，冇諗咁多嘢，都係踢完波影張相，冇諗過大家反應咁大，係我疏忽，令大家對我失望，我真係好簡單嘅人！」

提到缺席陳志雲網上節目，對方卻為他平反，Edmond即向陳志雲道歉，並解釋：「本來答應上去唱幾首歌，但我心情真係好差，遲啲先啦。（明你嘅就明你？）唔好講喇，我驚講多錯多，總之大家身體健康。」