【獨家】一個「冇性趣」一個自己解決 林作證裕美絕對唔係淫婦

麥明詩舊愛林作戀上失婚裕美，但兩人背景及學歷懸殊，所以戀情未獲林媽媽接受，更揚言兩人堅持結婚生仔的話，就會斷絕母子關係。雖然阿媽唔like女友，但林作無懼阻力及俗世眼光繼續去愛，裕美冧到爆：「咁多個男人，最有安全感係佢。」兩人更互揭「性事」，男嘅懷疑自己不育，女嘅自爆「冇性趣」仲笑男友鍾意自己解決性需要。採訪：方騫平

林母對裕美有偏見，後者絕對明白：「父母一定想個仔揀個好嘅，但我覺得應該著重性格多過背景。路遙知馬力係啱嘅，我唔會刻意討好佢媽媽，只係做返自己，我唔係聖人，亦唔係心地唔好嘅人，會盡心盡力對每個人。」講到聲名唔好，裕美坦言，「啲人有乜資格評價我?佢哋完全靠睇花邊新聞認識我，好多藝人喺報導中講到點好，可能好虛偽。我唔識包裝，甚至唔識保護自己，連之前家暴都冇講過。」

冇打算結婚生仔
對於外界指裕美係淫婦，但林作眼中嘅裕美絕對唔係，「裕美好有中國人嘅傳統思想，覺得清者自清，其實係假虛偽，咁樣令人誤會加深，係佢咎由自取。」講到兩人最夾地方，林作話係同樣簡單及爽直，他說：「現實中個個戴頭盔，好隱瞞。」林作又坦言唔打算結婚生仔，所以唔會觸碰到阿媽底線：「今日都唔知聽日事，都唔知咩世界啦，大家唔好太著重兒女私情，而且我懷疑自己不育，但唔係不舉，係精子密度唔夠，我男性之風係好好嘅。」在旁裕美陰陰嘴偷笑說：「佢成日自己解決㗎，所以唔係好關我事，因為我冇性趣。」林作說：「我係一個好獨特嘅人，所有問題自己解決！」