【《男排女將》煞科】成功抄Stephy牌 ERROR隊長肥仔興奮PK

因為疫情影響，由Stephy、一眾MIRROR及ERROR成員主演的ViuTV劇集《男排女將》拍足大半年，昨日終於煞科。ERROR隊長肥仔趁機向「女神」鄧麗欣（Stephy）「抄牌」，肥仔話:「今次最大嘅得著就係我捧住ERROR嘅精神走去抄咗Stephy牌。」而Stephy亦非常大方留低電話，肥仔一臉難以置信地開心大叫，更出現間揭性失控突然奔走，之後有人提醒肥仔叫佢試打，Stephy電話飛到留言信箱。

正當大家取笑肥仔「食檸檬」時，Stephy即拿出手機遞畀肥仔睇，畫面有佢嘅「未接來電」，成功「抄牌」兼畀Stephy肯定嘅肥仔興奮尖叫加O嘴加喪跑，唔覺意仲跣腳PK，好彩夠厚肉，無事。

當肥仔將「抄牌」短片上載ig，並留言，「我人生又成功解鎖咗一項」後，Stephy即留言：「冇咩事唔好搵我！」相當玩得！