表演場地繼續限入座人數　梁祖堯爆Seed：我哋真係唔使再做

近日本地新冠肺炎疫情暫時緩和，政府亦宣佈明日（19日）至下月2日，公眾地方群組聚集人數，由8人放寬至50人，而食肆可獲豁免，不設人數限制；至於較高危的酒吧、夜總會的每枱人數，將由4人放寬至8人，卡拉OK、派對房間及健身中心等場所則由8人增至16人。對於不少行業來說，進一步放寬「限聚令」是一大喜訊，但對戲劇界來說似乎幫助不大，事關康樂及文化事務署昨日宣佈，轄下的音樂廳、劇院、演藝廳、文娛廳和表演場將於明日重開，但規定觀眾入座人數不可超過原定可容納的人數一半。

受疫情影響，原定3月舉行的舞台劇《新聞小花的告白2》延至8月公演，主演的梁祖堯今日就於社交網發文鬧爆：「各位觀眾，劇場座位只開一半，我哋票房收入少咗一半，莫講話賺，連Break even都做唔到。個劇無得做一半㗎，景無得起一半㗎，人無得減一半㗎，排練時間唔會少一半㗎。點做呀？又話放鬆限聚？室內唔受影響？咁劇場仲係開放一半觀眾席，我哋真係唔使再做㗎啦。」