馮盈盈約樂易玲食生日飯 江嘉敏搵林凱恩食浪漫Fine Dine

江嘉敏和馮盈盈早前傳因「船P事件」鬧不和，本月初前者更於社交網發文，寸爆稱「聽到啲唔應該聽到嘅嘢」，又謂「說話唔能夠亂講尤其係大話」、「人言可畏」、「真係知人口面不知心」等，令外界懷疑她暗寸馮盈盈講大話。雖然兩人好快就否認姊妹決裂，昨日出席《TVB Amazing Summer》記者會時，還有講有笑兼攬腰合照，但二人一直以忙為理由未約食飯，而昨晚，江嘉敏反而約了林凱恩（Iris）去5星級酒店，望住個維港景色食西班牙菜，非常浪漫。

事後，江嘉敏於IG出Po向Iris表白：「約咗好多日，終於約到。唔想求求其其食餐飯就算，望住海景，聽住音樂傾下計，有啲浪漫。浪漫到超人有少少呷醋。佢好細心，剝緊蝦殼時問：『使唔使我幫你剝丫？』講完就直接將剝好嘅蝦放咗係（喺）我隻碟，而我又啱啱好偷望咗佢一下，剛好對上大家眼神。然而，我一直好喜歡佢嘅口頭禪『平安就好』，同佢個人一樣好善良。我性格火爆，而佢啱啱相反。燥底嘅時候有佢係（喺）身邊，一隻手攬住你膊頭，一邊做樹窿吸哂啲負能量，感覺好似小男友。佢，係一個Man得嚟好sweet嘅小女孩。#佢話好鍾意攬住我條腰因為我啲肉彈彈下 #簡簡單單就好 #做人何必咁複雜 #佢真的善良唔容許有人蝦佢 #今次我準時到佢眼都突埋 #個景真係靚」Iris亦於個人帳戶冧回：「一本求生指南跟一碗心靈雞湯，兩個女孩的晚上。跟她在一起每次約會的地方都很浪漫~像一個女朋友很重視跟我晚餐的感覺。她，烈得來又很可愛 #throwbacklastnight #地點不重要重要的是人」

至於本月10日26歲生日的盈盈，剛才也於IG貼出照片，原來她昨晚約了無綫高層樂易玲食生日飯，她寫道：「26歲生日，願望是人人身體健康，平安順遂，逆境盡快過去雨過天青，多謝小姐為我慶生，感激身邊有很多愛我的人，給我滿滿的愛和支持，你們的祝福我都收到。It’s my 26th birthday, and I’m getting better. #HappyBirthdayFYY」有眼利的網民即留言問：「第五句係咪打漏咗嗰『樂』字？」、「樂小姐無咗個姓」，不過未知江嘉敏幾時先同盈盈補祝生日呢？