模擬經典珠寶廣告片阿Sa反眼扮八婆勁盞鬼

2020-06-17 11:00

容祖兒(Joey)、鍾欣潼(阿嬌)、蔡卓妍(阿Sa)、關智斌（Kenny）、張敬軒及霍汶希(Mani)一走埋就玩得好癲，昨晚Mani喺IG上載一條搞笑短片，片中模擬當年由黃佩霞演出嘅經典英皇珠寶廣告片。

今次由阿Sa做女主角，戴住圓形大眼鏡嘅阿Sa撞開晒緊名錶及珠寶嘅Joey，一臉妒忌在想：「咁多首飾，都唔知係咪畀人包嘅！」點知識讀心術嘅Joey，由軒仔配音回應：「我啲首飾係我自己賺返嚟㗎！」阿Sa邊印粉邊死撐說：「唓，又唔係話你，話佢啫嘛！」接著阿嬌入鏡行埋阿Sa身邊，由Kenny提高聲調配音說：「太太...我啲首飾係我老闆送㗎！」阿Sa冇晒癮兼反晒白眼再發出唓一聲，片尾係slow motion，由Joey蹺住阿嬌手，撥弄頭髮，飄逸地由房間走出嚟作結。

由於阿Sa演「八婆」，藐人兼反白眼嘴臉演得好入戲，唔少網民讚好，仲話不斷翻睇咗10次。最搞笑係眾人不停發出登登聲做背景音樂，當輪到Kenny為阿嬌配對白時，因為提高聲調變咗走音，連他都忍唔住偷笑，引到「配音組」全部笑晒，不過就真係幾有趣，好歡樂。唔少網民話好好笑，成班都癲㗎！要求要有續集，仲強烈要求龍虎豹龜猴五個合拍一套喜劇電影，一定超好笑！有人問點解最尾唔係張敬軒同關智斌拖手Ending？亦有人認得，場地係張敬軒屋企，指他們反轉大叔間屋。對於被讚入戲，阿Sa即強調說：「其實我係扮緊Mani！」