應網友要求出售有味底褲　林作開價 2千蚊：好過做保險

自2017年放棄執業大律師資格後，林作便轉行做藝人、補習名師、專欄作家等，繼早前宣佈撈過界做保險後，最近他又於Instagram（Ig）開二手名牌店，當中主要出售自己、母親、富二代及名媛朋友的貨品，包括手袋、首飾、鞋履、服裝等！林作亦於Ig介紹中，自稱「已賣出100萬的貨品」，反應熱烈，日前仲吸引到一名「另類顧客」，要求買他的「有味底褲」！

昨日，林作於社交網公開了雙方的對話截圖，該名顧客直接問：「有售你的二手底褲嗎？」林作似乎都不介意出售，還獅子開大口答：「有，2千元一條，因為我着過。」點知對方都冇討價還價，又問有冇得揀款？有冇簽名相賣？非常有生意頭腦的林作就提議：「我可否賣10條畀你，加簽名相。」最終這單生意有否成交就唔知，但事後林作留言：「#百貨應百客 #真實對話 好過做#林作保險 #林作二手名牌店」有網民睇到就笑謂：「冇洗過的加$1000」、「要加埋拍片證明你着過」，相當爆笑！