【頭條獨家】Stay Home太耐 蘇玉華潘燦良出街郁吓

近日香港的新冠肺炎疫情錄得多日零確診，專家都叫香港市民唔可以掉以輕心，依然要戴口罩加勤洗手。因為感覺無咁危險，條街都多咗好多人。近月發起撐舞台劇同行計劃「PROJECT ROUNDABOUT」的蘇玉華及潘燦良都忍唔住出咗銅鑼灣行街，兩人乜都睇，衫又睇，波鞋又睇，香水又睇連錶都睇埋，睇嚟真係悶咗好耐。採訪:梁志明

首先要讚吓蘇玉華同潘燦良，自己嗰行自己救，眼見舞台劇界受新冠肺炎嚴重打擊，有表演者被逼轉行，兩人舉行4場的《不日上演》讀劇會，令舞台劇界從業者繼續有工開，亦會一改昔日行規，在籌備時便會向台前幕後員工即時發放酬金。據知讀劇會得到熱烈迴響，有人願意免費提供現場錄影服務，亦有人願意出錢資助等，好人一生平安。

係咁行係咁睇
當日下晝4點，戴咗帽及口罩，穿便服嘅蘇玉華同潘燦良拖住手去咗銅鑼灣皇室堡行街，兩人先去睇香水同化妝品，睇咗一陣冇入手，然後行去百德新街睇鞋，咩類型嘅鞋都啱，然後再去睇衫，運動衫啦，衛衣啦，風褸啦同Cap帽，都係得個睇字。然後去咗睇家品，行咗半個鐘終於有收穫，之後再去睇智能手錶，見蘇玉華試咗好多款，男友都不斷有畀意見，但都係冇買，最後兩人行過一間海鮮餐廳，門口睇陣餐牌，潘燦良有啲興趣，蘇玉華冇興趣，所以就同餐廳講拜拜。