【英皇天下一合作】衛詩雅願減片酬 陳家樂望多拍喜劇令人開心

對於英皇電影與天下一電影製作有限公司宣佈攜手合作，雙方將於兩年內合作製作及發行共十部香港電影，英皇旗下藝人衛詩雅、周家怡、李靖筠、楊天宇、陳家樂和湯怡均叫好。

衛詩雅：「好開心有呢個，因為我覺得兩間公司合作首先會有唔一樣嘅火花，二嚟就係如果開十套咁多，我覺得無論對演員或者電影工作人員都係一個好好嘅消息，因為起碼有工開。確實喺呢幾個月，好多電影都停晒，大家都好擔憂，所以好支持呢個計劃。當然如果減片酬可以幫到，絕對係願意減片酬啦，同埋依家積極會搵多啲好劇本，拎返公司，睇下公司有無興趣，絕對支持。」

周家怡：「知道呢個消息當然係好開心，好支持，好開心知道佢哋有呢個行動，咁希望快啲多啲人可以開工啦！同埋希望可以拍多啲唔同題材嘅戲，除咗商業片之外亦都會拍一些藝術性質的戲，透過電影故事帶出信息畀觀眾。」

李靖筠：「當然好開心可以同唔同嘅公司合作，希望擦出新嘅火花。至於想拍啲咩戲？我仲係一個好Green嘅演員，所以我唔想咁快去規限自己，咩種類嘅戲都好想做。」

楊天宇：「因自已性格較外向，陽光青春及搏擊類的，較刺激的題材都會是希望拍到的題材，其實天下一亦有同自已年齡相近的演員，希望藉此機會可以交流交流。我覺得今次英皇同天下一的合作對香港業界有一定幫助，不論係台前或幕後。同時亦可以滿足到觀眾嘅慾望，因為無論係咩時候我相信觀眾睇電影嘅慾望都唔會減低。」

陳家樂：「咁當然係好事啦，兩間公司聯手創作十套港產片去幫返香港市場，咁係非常之好嘅，係呢個時勢好多台前幕後工作人員，都的確係有好大嘅影響，咁我都有幕後嘅朋友，呢段時間都變咗要轉行，要做其他唔同嘅工種，其實人才流失係真係會㗎，依家有呢十套電影，希望可以幫返多啲人去做香港電影，去保持產量同質素。我希望嚟緊可以拍多啲喜劇，因為喜劇可以令人開心啲，依家香港都需要一啲好開心嘅能量，希望可以透過電影畀到開心嘅氣氛香港人。」

姜皓文：「絕對支持，義不容辭！需要到我幫忙，乜都冇所謂唔使講嘢！電影圈就係咁團結！」