【愛靚唔愛命】新戲30個造型破紀錄　 衛詩雅首著和服貪靚寧捱餓

由衛詩雅（Michelle）主演的愛情小品《熟女愛漫遊》將於4月2日上映，全片在日本東京取景，為了突顯由衛詩雅飾演的「陶莎莎」天真率直的性格，電影美指出身的導演蔡潔鈴和服裝組，特別為她度身訂造了超過30個造型，Michelle表示：「開拍之前試造型，導演話可能要試兩日，我心諗有咩可能要試咁耐？點知上到去以為自己去咗Boutique，因為佢哋差唔多準備咗成50套衫，而且好多都係走可愛路線，好Cute好少女又Colourful嘅服飾俾我，每試一套衫都覺得自己後生晒，變返22歲嘅年紀，其中有幾個造型我好鍾意，劇組拍完戲仲特登送俾我留念！」

Michelle仲話：「其實電影中好多造型我都未試過，因為太過可愛唔係我嘅Style，但諗深一層，到咗呢個年紀應該都無咩機會係現實生活中着呢啲衫，所以好珍惜拍戲時可以着得咁青春。不過拍戲初期我都因為太多造型搞到好混亂，成日都唔知自己拍到邊場戲，要花啲時間諗返劇情同情緒。加上我哋套戲要轉好多場景，仲要大部分都係一啲平時旅行去唔到嘅地方，所以好多時都要係街換衫，甚至試過一日要換3、4個造型，但亦都因為咁，俾我練成極速換衫又唔會整花個妝嘅技術。同埋因為啲景同造型好靚，導演同監製特別砌咗本寫真集送俾我，真係一份既窩心又有獨一無二嘅禮物！」

電影有一場戲講述「陶莎莎」相約了日本朋友參加廟會，為了配合劇情，Michelle與男主角唐禹哲都要穿上傳統和服，Michelle表示：「我第一次着和服，所以唔知道原來係咁講究，劇組特別邀請咗一個和服師傅嚟現場協助我哋着衫，我見唐禹哲好快就着完，咁我就諗住拍完先食飯，等上鏡可以靚啲嘛，點知我着咗成個鐘先搞掂，套和服連埋頭飾有成7、8磅重，仲要係超緊身，係想大力啲呼吸都好難，所以我最後要等拍完成場戲先可以再食嘢，不過第一次着和服嘅體驗好有趣同新奇，大家見到我一身和服造型都讚我Kawaii，所以為咗靚捱一陣肚餓都係值得嘅！」