小網紅Lucy撐爸爸李璨琛新作 樂瞳自薦做奶媽

李璨琛（Sam）趁聖誕節帶同囡囡Lucy及創業作《大盜演》一眾主演姜文杰、樂瞳、潘伯仲、鄺家瑜（MaryJane）齊齊報佳音；小網紅Lucy更以聖誕小孩造型現身，一班哥哥姐姐爭相跟Lucy自拍同抱抱，齊唱聖誕歌！眼見Lucy一出現即成風頭躉，李璨琛直言：「成立公司後會簽新人，好開心簽咗年紀最細既新人Lucy，佢知爸爸有新戲，仲自薦做宣傳！」

監製李璨琛表示今次電影起用了不少新人如潘伯仲、鄺家瑜，出道已多年的樂瞳也禁不住笑言：「其實我都係新人，電影界嘅新人，好多謝監製畀呢個機會我，仲係演阿Sam分咗居嘅老婆，下次可否再找我？」璨琛回應：「好啦！下次你就來做奶媽⋯⋯哈哈！應該話做保姆。」樂瞳話：「奶媽我都ok，照顧晒大家！」至於姜文杰就說：「細細個就聽Sam哥啲歌，幻想過日後可以同佢一齊合作就好啦！今次在電影主題曲《Keep Rolling》可以一齊唱，真係好興奮！」

創業作後，李璨琛的公司Soul Crew亦有一連串的計劃，他透露說：「嚟緊公司會想開兩部電影，一套由姜文杰負責策劃的音樂電影，另一套目標係《香港製造2020》，會嘗試做導演，現在努力當中，希望出年同大家齊上齊落！」