【頭條獨家】跟媽咪去Shopping 李璨琛網紅B女超萌放電

去年屋企多咗個happy baby嘅李璨琛好幸福外，儲落近10萬粉絲嘅網紅B女元元亦帶畀好多人歡樂。近日，人夫首先監製賀歲電影，同金像影后曾美慧孜、泰沛等於泰國開工，李太就主力湊女啦！日前傍晚，高瘦李太約咗女友人帶網紅B女行銅鑼灣利園。媽咪掛住揀衫仔時，肉丸妹好開心咁拎住兩個汽球喺商場放電，打扮可愛嘅元元不停笑笑笑，真係冧死人！   採訪 : 梁志明

多得李璨琛（Sam）同佢愛妻梁志瑩養肥可愛B女，囡囡元元人如其名圓碌碌，cute到爆炸。日前傍晚6時，阿Sam要趕拍新戲，歲半B女元元又無時停，李太就湊萬人迷B女出街放吓電。當日，人妻約咗女友人一齊行利園童裝樓層。當李太睇緊高級童裝時，托友人幫手睇住肉丸妹。着上連身長裙嘅齊蔭元元打扮加晒分，可愛B女兩手拎住汽球猛fing，玩到瞇晒眼仔，勁興奮。其間有途人夫婦嘅B女，無論年齡、外貌都同元元激似，遂停低讓兩個萌爆B女一齊玩。做慣寫真小天后嘅肉丸元元唔怕生保，向B女大方送上手上汽球，兩B玩咗一輪，再影番張twins合照才say bye走人。

玩波開心猛笑
逗留一小時，李太買咗兩件衫仔後就拖寶貝女去附近一間台灣菜館食飯。見人妻向愛女細心餵麵，惜元元扭計擰頭唔肯食。媽咪唯有出絕招，拎出私伙紫菜，再剪碎畀阿女慢慢嗒。食飽飽，三女步出門口，女友人抱住放晒電想瞓覺豬嘅元元，李太就截的士，然後齊齊回家。