【頭條獨家】Dry爆盛女掃面膜　素顏康華見鏡頭即閃

人稱「美魔女」的康華早前憑無綫劇《金宵大廈》人氣急升，48歲的她無論戲裏戲外都咁貪靚，可惜Keep得咁Fit，至今仍是「黃金盛女」。日前，Dry爆的康華獨自到銅鑼灣Shopping，其間發現被記者拍下素顏樣後，即嚇到耷低頭搵路走，之後都不忘衝去藥妝店掃番兩盒面膜先返屋企，果然好貪靚！採訪：李權威

早前熱播的無綫劇《金宵大廈》中，飾演「雪花賓館」老闆Yuki姐的康華，貪靚到不惜浸「血浴」保美貌，可謂走火入魔！然而現實中，年屆48的她都一樣咁注重保養，除了一得閒就去美容院做Facial外，仲好勤力做運動兼飲湯水、少食煎炸嘢，如此有恆心，難怪睇落好似30幾歲少艾一樣。雖然她是不少熟男心目中的「女神」，但事實上，早前康華都自爆已經單身10年，甚至連緋聞都冇！

日前下午，一身Sporty Look的康華，獨自去銅鑼灣利園行街，穿上灰白迷彩褸、頭戴太陽帽的她，打扮潮得嚟都幾Young。甫走進時裝店，康華望了幾眼衫後，便忍唔住企定定喺落地大鏡前照一照，見到鏡中的自己咁Beautiful，她都好滿足地笑咗一笑，所以衫都唔使買就好Happy地走了。不過，一行出門口見到有記者在場，素顏的她即刻嚇咗一跳，然後9秒9好怕醜咁耷低頭撳電話，仲急急腳搭扶手電梯落樓𠻹！落到地面，康華一路行一路同電話中人密密斟，之後一個快步就兜咗入一間藥妝店，她先Scan吓門口位置的一堆面膜，其後再叉腰瞄吓側邊支洗面膏，繼而研究咗一陣前面的防曬用品，結果最終都係行番轉頭，拎咗兩盒面膜就去畀錢。