【頭條獨家】泰國直擊開公司為同業製造機會李璨琛做監製為當導演鋪路

2019-12-13 20:15

李璨琛（Sam）最近跟姜文杰等人成立製作公司「Soul Crew」，創業作《大盜演》早前到泰國曼谷取景，Sam除了主演還兼任監製。Sam坦承開公司為自己製造機會外，亦為同業籌謀，更希望幫到一班新演員，好似今次有份演出的潘伯仲和鄺家瑜。Sam坦承自己亦有個導演夢，現在希望透過監製工作，加深了解電影製作，為未來做導演鋪路。採訪：杜淑霞

入行23年的 Sam坦承做演員好被動，又缺乏安全感，令他一直有開公司諗法，「幾年前都有呢個構思，製造機會畀自己同其他朋友，有個班底喺度，我哋係做得到㗎喎！於是集合咗今次個導演鍾盛遠、錢江漢同埋Benji（姜文杰）成立呢間公司。」

人事最難搞
這套作品前，Sam已先後為網劇及電影出任過監製，他坦承最困難除了資金就是人事問題，「人事最難搞，了解完呢邊又要同嗰邊講，以前人哋做我調解員㗎嘛！對自己EQ都係個練習，自己都衝動，𠵱家訓練得多真係成熟咗，始終多咗個身份，成個劇組都要顧，了解多咗其他部門嘅運作，對淨係做演員都有幫助，會多咗體諒。」Sam坦承都有想過做導演，所以多做幾部監製學習，「一人分飾幾角，冇話唔得嘅，做多幾部先，到有一部好啱心水或者好想拍嘅就嘗試吓。」Sam亦承認現在自己有小小能力都想幫吓新人，所以呢日專登搵埋潘伯仲和鄺家瑜去練體能，「做演員除咗記對白走位，都要識啲動作旁吓身嘅，我哋一齊去做Gym睇吓你哋夠唔夠fit啦！」