【頭條獨家】買化妝品對女Sales超Cool　唐貝詩見幼齒男即笑

剛於泰國拍畢賀歲片《大盜演》返港的唐貝詩（Lydia），早前單拖到銅鑼灣濕平慰勞自己，其間先後逛了兩間化妝品店，惟單身多時的她卻前後「兩個樣」，事關本來Cool爆對住女職員的Lydia，一見到「幼齒」男職員即笑晒口，真係好現實！採訪：梁志明

31歲唐貝詩今年獻出好多個「第一次」，包括首次演出舞台劇《死人的手機》及賀歲片《大盜演》等，事業上可謂愈見起色，無奈愛情方面卻一直交白卷！Dry到爆的Lydia早前獨自到銅鑼灣希慎廣場買化妝品，一身Casual look、戴墨鏡的她，甫走到第一個化妝品專櫃，女店員即上前Stand by為她服務，可惜Lydia冇理到，繼續埋頭自己研究，之後更拎起支皇牌定型睫毛啫喱試上面，見兩支大減價，最後梗係秒速入手啦！

一見男職員心花怒放
隨後本來面無表情的Lydia，行到去第二間化妝品店時，一見到個白白淨後生男店員來招呼自己，她馬上托一托眼鏡，仲忍唔住嘴角向上揚，心情靚咗好多！比起對住上一間舖頭的女店員，Lydia的態度明顯180度大變，事關她今次不單止好用心聽男店員講解，仲索性除埋副超，騷出一對明眸慢慢睇，後來更坐定定讓對方幫自己化個靚妝，其間Lydia還開心得一度露出雙下巴𠻹！