體會母親偉大 吳若希趕返家同媽咪賀壽
2019-12-08 20:36 
吳若希（Jinny）媽媽4年前因踩單車發生意外重傷入院，要做開腦大手術，幸而經已康復過來，令到孝順女都鬆咗一口氣，更加體會到做母親的偉大，所以視兩歲半的淼淼Giselle為掌上明珠，真係鍚到燶㗎！
昨晚Jinny入咗TVB為《善心滿東華》表演，原來她的愛女淼淼係Jinny小fans，淼淼透過電視見到媽咪唱緊歌，即肉緊上前摸住電視熒幕不停重覆講：「媽咪、媽咪、媽咪、媽咪、媽咪....摸手手！」相當可愛。連吳若希都忍唔住開心share，發文留言：「由佢老竇send呢條片畀我到今朝，我loop咗超過一百次，就係為咗聽佢講摸手手....有了你等於有了全世界！」唔少網友都留言：「So cute！」不過有人苦口婆心提醒Jinny：「可愛，不過不要行近電視，影響眼睛！」亦有大讚Jinny：「愈唱愈好，加油！」
另外，尋晚Jinny做完《善心滿東華》後就飛奔返屋企，原來孖住細佬同媽咪切餅慶生，Jinny喺社交網晒相兼留言：「趕得及回來陪你吹蠟燭，生日快樂。」鏡頭前唔見咗淼淼同Jinny老公Alex，但三仔乸依然好溫馨呀！而且發育中的細佬仲好靚仔好搶鏡添。
關鍵字
最新回應