【頭條獨家】泰國直擊 胡慧沖地膽教路又食又買 唐貝詩凌晨收工照去玩
2019-12-03 20:13 
唐貝詩（Lydia）早前參與首部賀歲電影《大盜演》，跟有「泰國通」之稱胡慧沖初結片緣，在泰國拍外景期間，Lydia當然搵埋地膽教路去至新至正好去處啦！呢日Lydia凌晨先收工，估唔到沖哥都搵到間新開通宵商場帶佢去食同買，難怪Lydia話今次拍得超爽，似大班朋友去旅行，兼可以向一班前輩演員學嘢𠻹！採訪：杜淑霞
沖哥呢日約Lydia去曼谷9月才新開的24小時商場，位於MRT Samyan 站的「Samyan Mitrtown」，「呢個商場因為好近大學區，方便啲學生溫習完食吓嘢飲吓嘢，所以呢度開通宵，就算你幾夜收工，嚟呢度都唔使擔心冇嘢食。」
喪食大解放
Lydia坦承首次拍賀歲片好開心，因為覺得拍過賀歲片才是香港演員一份子，所以今次拍攝她好認真，希望以最佳狀態演出，連日來都唔敢食大多嘢，「今次拍攝我都係演一個旅行團嘅團友，所以都有啲度假feel，不過今日有場露腰戲，所以要忍口唔敢食嘢怕會有肚腩，𠵱家終於可以大解放啦！」
於是沖哥就介紹Lydia去食傳統船麵，細細碗有唔同配搭口味，兩個竟然食到唔知飽，食了足足十幾碗，相當誇張。食完好嘢，沖哥再帶Lydia去超巿掃零食，「呢間大Ｃ超巿好多人香港都識，但喺曼谷得呢間有24小時，嚟呢度就想幾時掃貨都得啦！」至於呢期泰國興啲咩口味呢？沖哥就推介，「呢期最多就係咸蛋口味嘅嘢食，另外仲有啲泰國醬料嘅口味一樣掂㗎！」Lydia當然好識做，掃咗大批零食請工作人員食。
最新回應