【頭條獨家】告別娘味 單文柔陪揀衫做Stylist 陳展鵬聽晒老婆話

時光倒流返去2017年3月，當時陳展鵬同單文柔被傳媒影到喺山頂摸黑談心，被記者撞破後即揸車走人，當年展鵬否認拍拖，話單文柔幫佢做形象設計，只係請食飯答謝，兩人扭扭擰擰到7月先至認戀情。然後兩人去年10月結婚，今年4月誕下女兒陳諾瑤（小豬比)。講咁多嘢想帶出原來單文柔真係識形象設計，上周二傍晚6點，陳生陳太去咗銅鑼灣百德新街Shopping，全程陳太發號施令，試呢件同試嗰件，陳展鵬好乖，聽晒老婆話，逐件拼埋鏡照，未着上身都Feel到型咗好多，陳太好嘢。採訪:梁志明

42歲嘅陳展鵬有女萬事足，喺社交平台經常貼7個月大囡囡陳諾瑤（小豬比）嘅得意相，網友狂讚佢亦樂此不疲貼完又貼。有個得意囡囡好滿足，有個對形象設計好有心得嘅老婆當然唔好浪費。

陳展鵬係咁換衫
當日下畫6點，陳氏夫婦喺百德新街「掃場」，用掃字因為兩公婆連環去咗三間潮店，分別係STUDIOUS TOKYO、Shine同D-mop，全程分工好清楚，陳太負責揀，陳生負責試，睇陳太眼光，唔算好特別，都係後生仔潮嘢，有運動型外套、有帽衛衣同拼布外套，襯牛仔褲同布褲都好睇，加對潮波鞋，咪變型男囉。陳太係咁揀，陳生有一段時間長駐更衣室門口，見佢出出入入多次，可能預知要不斷試衫，所以只簡單穿白Tee方便換衫之餘襯乜都唔會出錯。

陳太試到恰眼瞓
陳生搭住老婆膊頭，掃完一間再去一間，動作都係重覆又重覆，陳太搵衫再畀陳生試，但可能陳生試到好攰，之後索性拎件衫拼上身照鏡就算，兩人行咗兩個半鐘頭，陳太戰鬥力開始減弱，見佢打晒喊露，眼神散亂，感覺佢好想走，之後俾佢發現有鍋釘小背囊，見幾得意就孭吓，一孭即回魂有返精神，差唔多9點，兩人終於收手唔再試，再行過一條街，將戰利品放上車就離開。