【頭條獨家】木口木面孤獨行街 陳逸璇瞓身揀枕頭

現年37歲的陳逸璇（Jolie）自兩年多前，跟墨西哥籍丈夫Marc Rodriguez離婚後，重新投入幕前工作仲唱番歌，雖然她早前公開表示不乏追求者，但事隔一排似乎都冇乜聲氣。日前，冇Friend又冇男友陪的Jolie獨自現身銅鑼灣，更於家品店瞓身揀枕頭，惜最後都是運吉冇幫襯！採訪：梁志明

陳逸璇前年宣佈跟墨西哥籍丈夫Marc Rodriguez結束兩年多的婚姻，回復單身後，她亦重拾歌手身份，於今年暑假先後推出《短暫的新分》及《良品》兩首新歌，當中仲大方分享失婚心情，一個多月前出席ViuTV音樂節目《Chill Club》時，Jolie更直認已有追求者，不過二人有否撻着呢？估計暫時都是「壞消息」居多！事關見Jolie近月在ig Po的照片，不是工作照、就是孖住閨密或家人周圍去，似乎都唔覺有乜戀愛跡象！

玩轉家品店冇幫襯

　　少咗個枕邊人陪，唯有去買番個靚枕頭挨吓啦，早前本報就發現Jolie孤零零現身銅鑼灣行街，一身黑白運動Look、戴Cap帽的她，於傍晚約6點幾急急腳走進利舞臺附近一間家品店。其間，熱心的女店員向Jolie逐一介紹啲枕頭，如人體工學類，要過千蚊一個，惟她全程木口木面，好似冇乜心機咁。之後，她又瞓喺牀上左試試右試試，可惜擾攘咗15分鐘都揀唔落手，最終還是兩手揈揈離開，認真「搞搞震冇幫襯」！