【頭條獨家】一天光晒 走出婚變危機 洪欣同老公湊女終於識笑

49歲洪欣和38歲的老公張丹峰結婚10年，去年7月男方被爆與經理人畢瀅過從甚密而鬧出緋聞，當時洪欣對老公表示信任，強調清楚知道兩人只是工作關係，但有消息指今年農曆新年期間，洪欣到重慶探張丹峰班送驚喜，卻發現老公同畢瀅共處酒店房，關係古怪令她拂袖而去，隨即傳出婚變。今年六月，兩公婆一齊去澳門睇已成內地組合「新風暴」成員的兒子張鎬濂開騷，表現一般，有指張丹峰一直為「偷食風波」努力箍煲，送車又報行蹤，總算𠱁番有米老婆！上周二，兩公婆帶埋5歲囡囡同女友人及另外三個小朋友去銅鑼灣shopping，張丹峰全程陪住太太睇首飾又護實個女好體貼，最難得見到素顏的洪欣終於識笑，咁咪好囉。 採訪：梁志明

洪欣09年下嫁張丹峰，姊弟戀最初不被看好，難得兩人愛得痴纏，5年後仲生埋個女張晞彤。無奈去年7月爆出張丹峰搭上經理人畢瀅，今年4月更傳出二人在酒店夜會。有指洪欣不但沒有為丈夫護航，張丹峰更承認有同老婆鬧過交，「婚變」似層層。隨住畢瀅引咎辭職，張丹峰為修補關係，除咗開工就長期陪住老婆，務求重拾洪欣對佢嘅信任。

冇以前咁sweet
今年9月，當時在內地拍戲的的洪欣返港與好姊妹蔡少芬慶生，同一時間張丹峰被本報拍到在銅鑼灣時代廣場shopping，最終冇買嘢，並沿黃泥涌道行返老婆名下豪宅，唔敢四圍去。而上月初，洪欣與張丹峰趁十一國慶假期帶女兒出國旅遊，但張丹峰只在社交平台貼出自己與女兒彤彤的遊玩相，未見一家三口合照，似乎兩夫妻感情仲未回復舊觀。

幫太太攞衫
事隔一個月，兩人關係終於有新轉機，上周二晚上7時，素顏洪欣同張丹峰帶住囡囡彤彤去利園睇珠寶，同行還有女友人同三個小朋友，只見他們在店內走嚟走去好開心。洪欣睇首飾時，囡囡又話要睇埋一份，張丹峰亦陪伴左右畀意見，老公識做，洪欣亦甜甜笑表示滿足。逗留咗約半個鐘，一行七人便離開。原本洪欣要孭袋又拎住女兒件外套好論盡，一直兩手fing fing嘅張丹峰即主動幫太太攞外套，可以加分啊。

兩公婆好傾
行到出門口，張丹峰對眼仲一直冇離開過囡囡，之後他一馬當先走在太太前面睇實個女，而洪欣就可以好安心咁同友人吹水，偶然張丹峰會搭嘴講兩句，只見洪欣全程笑咪咪。之後他們慢慢沿黃泥涌道行去禮頓山時，張丹峰繼續同老婆洪欣有眼神交流好好傾，成個Shopping過程輕鬆又溫馨，睇嚟一天光晒咯喎。