首次合體賺奶粉錢草蜢巡唱走足3場滿足fans

2019-11-06 14:24

草蜢的蔡一智、蔡一傑和蘇志威（蘇老闆）成軍34年，最近首次合體賺奶粉錢，難道有「小草蜢」誕生？三子哈哈大笑否認，原來只是為奶粉品牌拍廣告。廣告中，他們穿上型格西裝在舞台上勁歌熱舞，展現Fit爆身形。雖然他們的平均年齡已有53歲，但體能仍然Keep得好好，他們表示平日除了勤力練舞外，蘇老闆分享心得稱要補養得宜，阿智就話會飲奶補鈣，而熱愛運動的傑仔說：「平時我哋游水、打波、跑步、行山……咩運動都做，要好好保養身體。」

拍完廣告，嚟緊他們要繼續做世界巡迴演唱會，由熱辣辣的馬來西亞雲頂唱到凍冰冰的美國。據知下周末在雲頂站舉行的是「Encore版」，傑仔解釋：「其實去年已經唱咗雲頂站，但因為好多Fans投訴買唔到飛要求再搞，所以咁快就返轉頭再開騷。」雖然是Encore再開騷，但蘇老闆強調內容是「升級版」，就算去年睇過再睇都會有新鮮感。

至於本月底在美國站則要走兩場，阿智說：「因為美國Fans太多，所以我哋決定28號先喺東岸開騷，然後漏夜趕路，隔一日就喺西岸再開。」他們表示會Keep住好嘅體能，交足百份之二百嘅精彩節目畀Fans欣賞！

關鍵字