【頭條獨家】自爆中學被侵犯 雷深如望新劇為女性發聲

雷深如（J.Arie）最近參與ViuTV劇集《假設性無罪》演出，戲中她演的「細V」因不雅片被公開受到網絡欺凌及同事歧視，一度跳樓昏迷。對於該劇以「＃Me Too」做主題，她坦承有意義，更自爆曾被性侵，但當時怕事不敢出聲，現在更想為女性多發聲。簽約新經理人的她，亦希望戲劇外多做音樂。撰文：杜淑霞 攝影：李維隆  髮型：Bowie Lo 化妝：Frances Ho@Jessica Chan Make-up team 場地：1963木十豆寸

J.Arie坦言入行以來，每次演出角色都好怪，今次都唔例外，「唔知點解監製同導演都好鍾意搵我做啲怪怪哋嘅角色，今次某程度上大部份戲份都好似鬼魂咁樣出現，不過後尾觀眾會見到我真身，到時會揭開啲秘密。」

望多做音樂
對於劇集以「＃Me Too」做主題，J.Arie覺得份外有意義，「以往比較少劇集會用呢個題材，自己有份參與都想引起大家關注呢個問題。」她更自爆中學時曾經是性侵受害者，「嗰時放學坐港鐵，試過畀個着住校服嘅男仔，喺後面用身體磨我背脊，當時車廂唔多人，所以唔係人迫掂到，我專登行開一邊，佢又再跟住我繼續咁做，當時自己好怕事唔敢出聲，不過畀着依家遇到，或者睇到有人畀人侵犯，我都一定會出聲，未來都想透過作品為女性多啲發聲。」

29歲的J.Arie未心急拍拖，因想搵到志同道合的男仔先開始，而父母亦冇催她，剛簽了新經理人的她，更希望先專注事業，「未來除咗戲劇，可以試多啲唔同角色外，都想做多啲音樂，不論係自己唱，定係寫歌畀其他歌手。」