【頭條獨家】長講電話秒秒幾百萬上落 Juno有型大佬陪妻Shopping

35歲嘅麥浚龍(Juno)同胞兄麥浚翹(大寶)均是圈內富貴潮流教主，全身衫加鞋加錶分分鐘過百萬，但兩人同樣行事低調。前者有親密混血女友戴庚玲（Janine），後者一早結咗婚，16年仲做埋爸爸，家有做Model嘅靚老婆李慧思（Cice）同一對得意孖仔。日前傍晚，好有型嘅大寶陪靚老婆喺銅鑼灣行名店，貴為法拉利香港及澳門獨家代理商嘅大寶電話接不停，生意秒秒幾百萬上落，明嘅。採訪:梁志明

Juno同大寶的父親為中建置地主席麥紹棠，據講身家至少有10億，係講緊幾年前喎。麥主席平時好忙，但一放假就會同老婆帶兩個寶貝孫去玩。早前就見到麥主席伉儷同兩個孫仔去太古城中心買玩具，湊孫生活相當快樂。

大寶好忙
大寶百足咁多爪，係潮流雜誌創辦人，鍾意儲古董錶，17年成為法拉利香港及澳門的獨家代理商，13年頭同前城大校花、後入行做模特兒嘅Cice結婚，16年尾榮升父母，孖仔好可愛。雖然結婚六年，但大寶夫婦仍然Keep住熱戀咁，大寶嫂不時陪老公出外公幹， 兩人又經常拍住拖Shopping。日前傍晚6點，大寶夫婦去銅鑼灣利園入貨，行完一間又一間，最後入愛瑪仕，全程係大寶嫂主力揀，大寶負責找數同拎嘢，陪老婆買嘢悶唔悶?大寶應該唔覺悶，因為佢Keep住講電話，有時笑住講，有時唔笑，好忙好忙好忙。