【愛．回家】「安美戀」惹負評 池美麗痛哭自勉：希望用努力感動你

TVB處境劇《愛．回家之開心速遞》周一（13日）播出的「假如愛有天意」，講述池美麗（鍾凱琪飾演）介入金城安（周嘉洛飾演）和Bonnie（林凱恩飾）的戀情，惹來不少觀眾嬲嬲，爆棄劇危機。有網民甚至對鍾凱琪作人身攻擊，鍾凱琪直言有唔開心，亦擔心自己做得不夠好，「個人嘅感覺真係唔好受。 但哭過痛過 悲傷過後，總要面對現實」，並表示雖然沒有能力令全世界人都喜歡她，「但係只要有一個人願意留意我。我都好樂意為嗰個人付出同努力。 」

鍾凱琪連日來在個人社交平台發帖回應，她前日表示，「雖然可能有啲評價會比較令人難以接受。不過你哋嘅責罵同埋支持，都係我的原動力。🙏 想傳達的訊息只有一樣： 🔆雖然我什麼也不是，沒有外貌，沒有能力。 甚麼也沒有。但不論戲裏戲外的我，都希望用我的努力，不放棄，肯付出去感動你🔆。終有一日即使曾經負評也能變成正評。」

不過，樂觀的鍾凱琪面對海量負評，也難免有唔開心。她昨日直言「冇諗過大家會有咁大迴響」，並謂「雖然收到你哋各方面支持嘅留言，但見到海量般負面的評論，坦白講真係有啲唔開心。（我都算係平常人，正常人畀人話嘔心，點都會有失落）。有諗過唔回應，等事情過去。但三思後，我還是希望同大家分享自己嘅小感覺。因為每一個願意追隨我ig嘅都係我最好嘅夥伴。

首先面對負評，我第一樣想的是『是否我做得唔夠好？』，『是否我的出現真的拉低了劇集嘅質素？』看到有人叫我退出劇組，或者會因為我嘅出現而可能選擇棄劇。個人嘅感覺真係唔好受。但哭過痛過悲傷過後，總要面對現實。香港精神，面對困難絕不可以逃避。不能逃避就只能勇往直前。我記得我都曾經多次提及，我冇能力令全世界人都喜歡我。但係只要有一個人願意留意我。我都好樂意為嗰個人付出同努力。」

鍾凱琪感謝劇組一直給予機會，「 我一定會逐少逐少進步，唔會令大家失望。我會同你哋賦予畀我嘅名字一樣『遲美麗』。她最後又重拾樂觀心情去看，「如果大家繼續如此討厭我下去，到年尾我是否有資格競逐『最厭惡角色演繹大獎』？可能對於很多人來說，池美麗係一個電視上唔討好嘅角色。但係對於我本人嚟講。佢係我人生一轉捩點，佢令到大家認識我。佢實現了我多年嘅夢想。也許佢嘅行為喺世人眼中有點兒偏差。但係佢對於我嚟講都係獨一無二嘅存在。」