樂●活｜捉住暑假的尾巴 大玩特玩

霎眼間已經8月尾，今年嘅暑假又特別短，學生仲有幾日就要開學，諗住趁幾日最後衝刺帶埋小朋友周圍玩，或者把握各個商場為夏日準備嘅活動，可以留意以下介紹。

●朗豪坊：人氣動漫《SPY x FAMILY間諜家家酒》即將推出第1季Part 2，加上經典動漫《海賊王》及《龍珠》劇場版喺8、9月相繼上映，朗豪坊就乘住動漫熱，喺即日起至9月12日聯同TAMASHII NATIONS舉辦「TAMASHII FIGURE FES夏日電影館」，以戲院為主題，展出多款1:1人氣角色立像及全新TOKYO限定商品。2米高嘅BIG MOM沙羅特·林林-花魁玲子立像坐鎮展覽入口，仲有1:1、約高1.7米嘅漩渦鳴人立像、 1:1孫悟空立像等，現場更會展出多款尚未公開發售嘅Figure。今次TAMASHII FIGURE FES更帶嚟4款全新TNS TOKYO限定品於現場「票務處」首次展出，包括機動戰士高達SEED、新世紀福音戰士、幪面超人ZERO-ONE及超人Z，並於期間限定店獨家搶先發售，限定店仲可以買到多款《SPY x FAMILY間諜家家酒》、《海賊王》、《火影忍者》、《龍珠》及《咒術迴戰》系列Figure。

●8咪半：為慶祝中染大廈落成40周年，8咪半聯乘本地城景水彩畫家Kelsey Chan喺即日起至至9月12日舉行「仲夏藝遊8咪半」。8隻精靈活潑嘅小恐龍和1隻剛出生嘅恐龍寶寶帶領大家暢遊8咪半，通過打卡場景細說中染大廈的紡織印染歷史背景。其實中染大廈前身為中國染廠，經過全面翻新及活化工程後，演變為現代辦公大樓及商場8咪半，為荃灣帶來時尚生活購物體驗外，亦見證了當區嘅發展和改變。商場更特設三重連環消費賞，即日起至9月12日以電子消費滿指定金額，即送「伴你飲」硅藻土杯墊或「伴你遊」多功能摺疊式收納箱。第二賞「消費券加碼賞」，只需以6大指定電子消費券支付工具消費即額外賞$100禮券，最後還有壓軸大賞「40周年同賞」，顧客身份證的出生日期只要有齊指定數字，即可免費獲贈$200禮券。

●YOHO MALL：場內除咗有YOHO MALL X KUMAMON 熊遊小鎮，讓大家可與KUMAMON同遊YOHO MALL I「KUMAMON玩樂不夜町」及YOHO MALL II「熊花園」8大打卡位打卡，同埋喺熊本縣特產店瘋狂入手熊本縣特產「手信」。場內仲有KUMATOWN 文創市集，聯同9個手工藝本地品牌推出聯乘KUMAMON文創手作精品，其中必買單品包括：皮革匙扣、手作耳環、各類型花藝木製擺設等，每款都獨一無二，有KUMAMON超萌加持。

作者：Laurie Wu（愛保健愛旅遊愛購物的熟女）
[email protected]