阿碌開咪｜為乜要交人？

最近美國總統拜登有兩個「舉動」，顯示背後有啲野搞緊。第一為親身拜訪曾經被自己形容為「殺人兇手」的沙特領袖穆罕默德．薩勒曼。咁樣打倒昨日的我，紆尊降貴主動求見，仲要畀對方反窒美國也曾在阿富汗及伊拉克虐囚，故冇權對卡舒吉被謀殺「說三道四」。究竟美國人對自己個總統如此扮「矮仔」，有乜感受呢？有乜重大到連面皮都不要的利益，需作出如此「核突之旅」呢？　

第二。墨西哥總統歐布拉多，上周去完美國見拜登之後，突然鬼咁「好死」，將長期的「政治籌碼」、大毒梟金特羅逮捕，並揚言可能送到美國受審！

其實金特羅的事迹，在美國及墨西哥無人不知。此人的傳奇性販毒王國，更被Netflix拍成半紀錄片電影，大播特播。

此君的巴閉，通晒天。由如何起家，到大量批發毒品到美國，再到行賄直達天庭手法，墨西哥早早家喻戶曉。有錢，就有大量死士替佢賣命，故自己有隊重軍火衞士，同時養起無數黑社會，誇張到「鍾意殺邊個就邊個」。一方面天文數字行賄，一方面痛下格殺令，故能在墨西哥這個無法無天國度，「自由出入」法院，視執法者如無物。

其實墨西哥總統當然知道佢匿埋喺邊，以及點樣繼續指揮販毒王國啦。不過，為乜要將佢交畀你美國佬先？

今番點解突然轉軚？當然有重大利益交換！可以看到的是拜登需要谷民望迎中期選舉，墨西哥則需要美國經濟援助及為國民爭取幾十萬張臨時美國工作證，解決國內失業問題。

所以，長期卡住美墨關係的一隻「政治棋子」，可以就此犧牲。

金特羅為美國人心中的一條刺，因曾在一九八五年虐殺及綁架聯邦掃毒局臥底探員卡瑪雷納，震驚全球。

結果判四十年有期徒刑而竟可走甩。當然，又是搭通天地綫！今番六十九歲了，可能對墨西哥掌權者「有用」的時日已無多，故被總統當「送大禮」畀拜登啩？

曾智華

阿碌開咪