阿碌開咪｜執到肯定喊天光

周二本報頭條《活化泡湯，珍寶海鮮舫下月離港》！這個結局，咪話小弟牙擦擦嘞，我也沒有水晶球，但年多前已在本欄高調指出，海洋公園自己已經蝕到眼坦坦，若再接收埋隻「爛船」（事實，海鮮舫雖然前睇仍然一枝花，後睇已經爛到嗌阿媽），真係會喊天光。　

弊在這個構思乃來自特首林鄭，故此，冇人敢反對，唯有……（這也可見特首行事作風，提出咗唔Work意見後，個個身邊人都寧願等佢出事，因提相反意見必被省一餐也）睇吓點先啦。除咗我呢類「多口傳媒人」，大力踢爆這個「躍動港島南」計畫，根本乃珍寶海鮮舫原東主的「甩身大法」，難得政府又烏殊殊受，更大鑼大鼓公布大家達成的協議——海鮮舫由海洋公園接收！

本來一聽就知的失敗計畫，竟因特首一廂情願，導致浪費年幾時間N咁多公職人員研究去「認真落實」。

不過……結果早早寫在牆上，因根本無任何商營機構會咁老襯，將隻爛船攬上身。第一，此船已毫無商業價值，若有，就唔會搞到今日咁款啦；第二，隻爛船就算唔郁，單單維修都要幾百萬元一年，啃嚟做乜？

相信各方面都計過算過，唉……執到都喊天光。更何況，你知我知大家知，林鄭都夠鐘落台嘞，花天文數字金錢去頂佢個「躍動港島南」計畫，仲有乜意義？生意人最現實，若有大大回報，幾百萬元至幾千萬元都冇問題。如今肯定零回報，咁就一哄而散矣。

究竟隻船拖去邊，未有人透露，總之就係下月移離本港，以免大家繼續尷尷尬尬。

計小弟話，拖乜鬼吖，一二三，當機立斷，拆咗佢當爛銅爛鐵賣啦。

因為你拖去第二個國家/城市，又要大筆運費。去到人哋度，一樣要頭痛處理呢條廢船。想簡簡單單執返企理佢，都要三五七千萬元，你估其他地方好多蠢人咩！

特首不是生意人，故此，在沒有生意頭腦下構思出的「商業決定」，真係得啖笑。

曾智華

阿碌開咪