樂●活｜品味新食力

疫情下少咗出去行街，亦都因為咁少咗發掘唔同嘅新店，最近同公關朋友傾開先知，原來美麗華集團今年有兩個全新餐飲品牌登場。 

美麗華集團旗下嘅國金軒、翠亨邨相信冇咩嘢唔識，而兩個提供嶄新飲食體驗嘅新品牌，分別係高級新派中菜「唐述Chinesology」，同埋打造創意素食體驗嘅海景餐廳「JAJA」。

為追求生活品味及高消費能力食客而設嘅唐述Chinesology，落戶中環國際金融中心商場，由中菜廚壇新貴周世韜師傅主理。餐廳裝潢以摩登中式庭園為主軸，着重演繹中菜嘅飲食哲學，同時亦設有酒吧，提供以中式食材為主題嘅特別調酒。

唐述特別重視演繹中菜嘅飲食哲學，實行將中菜重新定位，以四個面向「型、念、事、物」帶來既熟悉亦富新鮮感嘅中菜體驗。其中，型是指重視器皿相與菜式的配合，突顯中式食材之美；念是以中菜烹調精粹為本，並注入新元素將之活化；事就是指飲食本不僅為果腹，精髓在於享受及交流，唐述就會有獨有嘅餐飲體驗，如四手晚宴、雞美酒搭配菜單等；物就係指精選最上乘之食材，特別重視時節五行的調和，不時不食。

至於另一個新登場嘅品牌「JAJA」就係因為近年素食潮流興起，但市面上未有太多選擇而誕生，打造結合全素食及樂活主義的海景餐廳，帶來視覺與味覺並重的創意素食體驗。

餐廳座落於灣仔藝術中心，裝潢及菜式設計均極具風格及想像力，打卡的同時以着重營養價值的無肉菜式及甜品為主打，帶動創新型格嘅素食文化，同時鼓勵透過素食提高生活質量及協助減碳排放。

JAJA是西班牙文，讀音為「哈哈」，顧名思意係一間宣揚樂活主義嘅餐廳。JAJA位於灣仔藝術中心，有開揚嘅維港景觀及陽台用餐位置，提供一個充滿藝術氛圍以及氣氛悠閒嘅用餐環境，店內嘅裝潢風格奇幻而富想像力，為視覺帶來驚喜，客人可以隨意探索充滿玩味嘅餐廳設計、欣賞

本地青年藝術家嘅畫作，亦可與電子藝術品互動，重拾童趣。餐廳亦會不時舉辦各式樂活主題工作坊，讓食客以不同面向體驗樂活。

作者：Laurie Wu（愛保健愛旅遊愛購物的熟女）

 

[email protected]