​​​​​​​阿碌開咪｜開盤開到嘭嘭聲

立法會選舉之後，先而聖誕，後而團年，快樂聚餐一場又一場而來。聚首人物，包括政界、官界、傳媒界、專業界（律師大多）及商界眾老友。

　　呢種場合，當然唔會講冇癮野，費事大家掃興。所以，一定要搵人人有興趣的Common Interest話題。咁，個個可以踴躍發言，大噴口水，但又唔使負責。

　　講乜呢？最受歡迎正是絕大部分人都冇得決定（包括遊戲規則及人選！），但又可以議論紛紛的——下屆特首之戰（有冇戰？）及人選。

　　一講此話題，個個都認秘聞專家及分析專家，總有自己的看法及「堅料」（定流料？）。

　　特首之戰，至今只剩三個幾月。如此重要一場選舉，仍乜細節、乜人選都未浮上水面。真係唔知乜葫蘆賣乜藥？

　　唔緊要，咁仲好玩，先來一場牙骹戰，幾乎所有飯局都開盤（其實搵定藉口下餐又食食食！）。

　　盤路眾多，包括：

　　一、林鄭月娥唔爭取連任；二、林鄭月娥報名爭取連任；三、下屆特首冇「戰」，因採取澳門模式，一隻馬入閘，一隻馬跑，人人只可買一隻馬；四、多過一隻馬跑，甚至似過渡期第一次選特首有多隻參賽。既已肯定隻隻「愛國愛港」，咁就邊隻跑出中央都應該放心！

　　四個盤，個個都有極大爭拗。

不過，小弟觀察，似乎噴口水的都只是以個人喜好及傾向分析，客觀成分甚低也。

　　四個盤，以第一及第二兩個最冇共識。即有一半人堅持林鄭雖唔表態，但觀乎佢的民望與阿爺遲遲唔出聲，可能暗示應「知難而退」，自動返屋企享天倫樂。

　　但另一半人則自認了解林鄭性格，唔輸得。第一屆「搞成咁」，肯定唔忿，誓要爭取連任，在一切「完善」後，管治變易事，施政應有大作為。

　　至於第三項，多數認為唔會嘞。因如今政治安全系數百分之百，冇乜風險。故此，扮下有得選較合民情及國家體面。

　　第四項呢？多過兩隻入閘？除非阿爺想煩啦，怕且唔會嘞！

曾智華
阿碌開咪