阿碌開咪｜張人龍的江湖地位

有幾位老派報界朋友，極之喜歡剪存名人、富豪或官界、政界權貴的訃文。

「阿碌，呢類資料，無價寶，因平時你絕無機會知道，原來逝世者背後與好多不同界別的名人、猛人有親屬或老友關係。儲儲埋埋，足可以編造一幅全港顯赫人物關係圖，極之珍貴！」N年前某前輩拉我講，用意明顯在點醒小弟——快快開始剪存訃文，對傳媒工作有極大作用！

結果因俗務纏身，從未開始做，不過，永不放過閱讀報上的名人訃文。

前日翻開報章，又見一全版「治喪委員會訃告」，引起小弟極大興趣細讀，因主角是上世紀六十至八十年代一位舉足輕重人物，一九六四年至一九六六年新界鄉議局主席張人龍的訃告。

張老先生曾歷任區域市政局主席、立法局議員。早年在香港的最大角色，為擔當港英政府與新界居民的溝通（講數？）橋梁，不知擺平了幾許極度棘手的城鄉問題，所以回歸前後的政府皆對龍叔極度尊重。這就可以解釋得到，點解張老先生治喪委員會的榮譽主任委員及主任委員，重量級到由梁振英及林鄭月娥，一前任、一現任特首擔當。

整個治喪委員會陣容非常龐大，單單副主任委員已六十四人，包括絕大部分現任司局長，以及鄉議局主席、立法會主席、部分行政會議成員，當然，全國人大代表也是少不了！

至於治喪委員會更是嚇人，一共有四百二十二人！內裏包括傳統新界知名人物、前政府高官、前任及現任立法會議員。藝人方面，也有一位，正是鄺美雲。

如此龐大陣容，睇睇有邊個之餘，小弟更有興趣為睇睇「冇邊個」，因事必有因也。

首先，並沒有兩位前特首董建華及曾蔭權，亦冇一眾傳統香港最頂級的幾位大大富豪。可能要「政治正確」，所以，亦冇當年與張老先生有溝通的民主派元老級人物。

究竟這張名單是否包含了由殖民地年代開始，近七十年的江湖恩怨呢？誰有資格拆解呢？

曾智華

 

阿碌開咪