【阿碌開咪】行為、身分、時空

最近聽咗一次個人形象公關分享會，講者所述的，頗引起我共鳴，也望政府高官們有所警惕。

佢講乜？正是：行為、身分、時空。

以前小弟負責管香港電台第二台，旗下頗多知名度甚高、形象極好的年輕人偶像DJ，個別對外好似好醒，其實有點「豬頭炳」，因入世未深，周不時闖禍，就要我補鑊。

責任必須負，因佢哋有問題，即我有問題，唔解決唔得。於是，不時要輪流召見，或分析，或訓斥。目的只有一個——形象止蝕（Control Damage）。

通常DJ出問題，被報章大肆批評或被投訴，基於抗拒心態，會一於死頂。

例如回應：一、我又唔係犯法，點解人人做得，我唔做得？二、我咪前/幕前係公眾人物，咪後/幕後點解唔可以做返個普通人？三、我做嘅時候，又唔係當班，為乜唔可以做？

事實當不少公職人員犯上形象災難時，佢自己甚或想為佢開脫的老友，都會用上以上三點去辯駁，覺得冇乜大不了，既然不是犯法，毋須大驚小怪地去處理。

試過上世紀九十年代時，有一位偶像DJ公開做出與公眾形象不相符的事，被娛樂版揶揄。當我在房內向佢指出問題時，反應也是憤憤不平，又用以上三點做擋箭牌。

小弟當然不會用鬧來達致目的，只以引導性問題令佢開竅。

一、咬口煙到外圍投注站買馬，絕對合法行為，但若你見到高官、校長咁做，覺得有問題嗎？（當然有！）點解？（與公眾形象不相符！）咪係囉，同合唔合法冇關㗎！

二、高官、校長、神父，工作時，當然有個令人尊崇形象。放工後，可否穿橡筋短褲拖鞋，踎在投注站門口刨馬經，做個「普通人」？（答：唔應該！）咪係囉，又係同個人自由及犯唔犯法冇關㗎！

三、控煙辦官員，放工後，可否大模斯樣在公眾地方吸煙呢？（答：可，但不應。因無論任何時候，都不應做與身分違背的事！）

講完，佢明白晒！

曾智華

阿碌開咪