【阿碌開咪】驚？咪買股票！

人，點解分成年及未成年？簡單，成年後，客觀要求，覺得你應開始心智成熟，懂得分辨是非黑白。所以，凡在自由意志下作出的任何決定，必須承受結果，問責！

但人性是只喜歡嘗到甜果，而不喜歡嘗到苦果，所以，當面對選擇時，一定「大細眼」，心理傾向是覺得必定得到甜果的，自自然然就避免去諗可能會有苦果。這種現象，在投資、投注、移民、戀愛這四大方面，最為普遍。事實，一般正常的成熟人，人生長路必定經歷選擇——失敗——開竅幾個階段。

不少智者講笑：「香港人，未畀人呃返三五次，邊會變精，又邊會真正成熟呀？」對！世情的確經常如此。所以，既然大家都要領嘢才能成長，咁就愈早領嘢愈好嘞。

一如長大過程中跌倒。BB跌，完全冇問題。青少年跌，伸手敏捷，就算拗柴斷骨，也會極快康復。但老人家跌？一次就可能再難站起來了。所以年紀愈大，事事要愈小心，尤其是觸及「棺材本」的決定。

今日小弟抽起條筋講呢個話題，因近日不少老友向我吐苦水，大呻：「碌Sir，慘呀。一日唔見幾十萬元呀，鬼知連藍籌地產股都可以一日跌一成嘅咩。嗚嗚嗚！」睇睇呢幾位老友，個個年紀唔細，全部六十開外，點解好似未見過世面咁嘅呢？

小弟初初出道，已被上咗天堂的著名股評家曹仁超點醒：「細佬碌，咪咁烏卜卜，人買股票，你又學人買股票，以為實賺？未見過有千七點跌落百幾點者，一定屬於天真無邪投資者，遲早退潮時輸甩褲，重重交學費㗎！」

明乎此，見到本周一跌一千點，在股災歷史大洪流中，根本濕濕碎。若連如此衝擊，心理質素都頂唔住，喊生喊死者，請問你有乜資格買股票？

股市，永遠有危就有機。識計真正價值者，正是長期等佢退潮，再落海邊尋寶。有冇人知幾時會跌夠？冇！但真正精明投資者，對幾隻鐵股，一定有個心中價，到位即掃，長揸！


曾智華

阿碌開咪