【阿碌開咪】啲錢係你嘅，會咁？

童年時，經常聽到長輩教訓人：「哈！假若啲錢係你嘅，你會咁？」

　　講乜呢？正是父母教訓子女，對別人的錢，對公家的錢，也應有個珍惜態度，不可大安旨意胡亂浪費，這正是基本的個人修養及處事態度。

　　我一路路長大，周遊列國，一路路發覺，良好公民教育的國度，必會珍惜資源，不作浪費外，大家對「阿公」的一切，也不會自私地胡亂揮霍。

　　直至自己加入政府，成為公務員，開始體會乜叫「一樣米養百樣人」。當然，有部分同事在處理公物公款時，非常合身分與得體，但確實有不少抱住——反正阿公嘅，話之佢啦！後者心態，上上下下皆有。

　　小弟早年曾跟父親涉足商場，發覺與政府內部價值觀，兩個世界。商場，事事講求回報，不但要合理，更要力求豐厚。任何高層管理人員不懂開源節流，必被大老闆照肺，省到立立令。

　　但是政府又如何？萬事有章則，總之跟足，切勿多事，自把自為Think Out of The Box，咁，發生任何事都不用上身。兼且公務員強調絕不可官商勾結，更無追求利潤，因為蝕的乃納稅人錢，你唔犯錯，就不用上身，也不用傷身。

　　這就解釋到，政府運作又近市場需要的，十之八九了無生氣，管理模式落後又堅離地，只年年失血而絕少「生血」。

　　領展未上市前，由房屋署營運的屋邨商場及停車場如是，早前我提及的郵政署也如是。

　　再放大一點，香港市民真係喊都無謂。因為養咗兩隻「大白象」，年年失血億億聲。一為港珠澳大橋，另一則為啟德郵輪碼頭。

　　上周末小弟到碼頭走了一轉，坐在椅上孤獨（四野冇人）地看海景。一方面無盡舒泰，另一方面則無限欷歔。

　　如此優質位置與景觀，竟然變「鬼城」，點解？你試下海運碼頭及商場係咁呀，負責人唔畀吳光正及吳天海「掟落海」就奇。個啟德碼頭，由公務員負責，真係關人過關，因蝕死又如何？

曾智華

阿碌開咪