【阿碌開咪】一定要大力過谷針

去年《港區國安法》推出後，整個政治氣候就是應做就去做，不用再私私縮縮窒下窒下。要推，就光明正大，以雄渾力量瞓身推！

　　例如打疫苗，擺明全球政府在谷，此乃唯一回復經濟運行的方法。有人揶揄「谷針」又如何？名正言順要谷的就谷，一於谷到七成人接種，出現免疫屏障，盡快恢復正常生活。

　　此外，推動國情教育也如此。過去多年，不少中央主旋律大製作電影，來到香港，幾乎套套票房慘淡。

　　喂！係人都知呢類電影未必合一般港人，尤其年輕人口味，但最奇，建制陣營點解冇二、三百萬人入場？成何體統？中央對這現象當然有微言。

　　我都感覺非常奇怪，照計香港的愛國機構及大集團員工人數日比日多，加上學校及社區團體（例如工聯會），總人數最少以百萬計。究竟所有呢類機構及組織的上層決策者，有冇任何紀律性的決心要盡谷「主旋律電影」呢？

　　小弟提議，應該好似谷針咁，送飛送工時（睇電影當返工），所有員工、會員、教職員及學生免費觀看。

　　過去每次呢類電影上映，我一睇票房記錄，個心都會一沉，不禁問句：「點解乜野都唔做？成何體統？」

　　好嘞，今次《1921》首映禮搞得有聲有色有氣勢，政府領導層、幾任特首、國安公署及外交部駐港特派員空群而出，到場造勢。開波而言，非常成功，咁後續又如何？

　　單靠觀眾以「市場定律」選擇性入場，效果一定唔理想，所以，政府應該有個Master Plan去谷。

　　簡簡單單如奧運播映，政府亦可「指令」所有電視台播出。咁呢套《1921》，理應在更高層次使出「組合拳」去推。

　　包括似谷針咁，各大財團送出免費飛任人入場。入場的人，又可抽獎（最好有樓有車啦），另外，推動所有愛國愛港團體包場，睇戲後有晚餐券送。最後，上畫完畢，全港電視台再輪流播，以確定深入民心。應做就要做，咪再窒下窒下！

曾智華

阿碌開咪