【阿碌開咪】澳門仲有乜吸引？

澳門封關N個月後，開始放聲氣通關，可以畀香港人過去玩，但列出一大堆純為香港遊客度身訂造的條件。我同老友們一睇，異口同聲說：「哈哈哈，真係你去埋我嗰分都得嘞！」

　　對於澳門，香港市民多有種特別感情，因為不少人第一次「離開香港」，就是過澳門。

　　小弟一輩，少年時，視過澳門為大事。因上世紀六十年代的香港，家境一般非常貧困，根本發夢都未諗過有機會坐飛機。我家老父死慳死抵，終於才儲夠幾百元，一家六口坐大船的船艙位，熬通宵過澳門。

　　上世紀六十年代，並冇飛翼船/氣墊船，只有舊舊的大輪船。人人似「屈蛇」般，睡在最廉價的艙底位。辛苦嗎？百分百 No！因有得「到外埠」旅行，那種幸福感，足以蓋過一切！

　　後來，到自己有收入，當然更不時三五成群拉隊過澳門，享受其歐洲小鎮風情，歎葡國菜。也試過一九七八年做《歡樂今宵》小助導時，多次拉衫尾，跟譚炳文、沈肥肥、李香琴等，唱完「歡樂今宵再會」後，立即坐快船過澳門西南酒家，歎其大裙翅。

　　總的來說，二○○○年前，澳門一切相當美好，真似一個風情萬種的歐洲淑女。

　　不過，之後……一切起飛了，尤其賭業。引來的，是洶湧殺到的賭徒，日日夜夜面青口唇白在賭場磨爛蓆。然後四散市面掃名牌，將昔日澳門的小鎮式寧靜，完全反轉。

　　經濟大旺，物價飆升，老牌餐館的傳統味道，慢慢一日一日失去。加上品流複雜，人潮處處，悠閒的旅遊樂趣，全面淡出。就如此，我已近十年再提不起興趣過澳門了，間中有朋友相邀，也耍手擰頭，因諗唔到有乜誘因要去接近呢個已沒歐洲味的小城市。

　　上周澳門放聲氣，開始畀香港人入境，身邊又有人問：「碌Sir，有冇興趣去？」一睇條件，真係儍的才會去。因多重防疫守則外，更要困在酒店，唔准用泳池。香港人要盡量住埋一層，擺明處處設防。答老友：「百分之一千冇興趣！」

曾智華

阿碌開咪