【阿碌開咪】千億稅收善款流走

星期三《星島日報》頭條非常搶眼——《疫下暴利逾150億，非法賭網港投注爆升，瞄準歐國盃狂吸金》，吸引我立即細讀。

睇完，唔……外圍佬吸咗一百五十億元，理論上，即係馬會少咗百五億元投注，影響之下，庫房流失天文數字博彩稅及本應用作慈善的捐款。

小弟搭通天地綫，立即找「非常堅料知情人士」問：「X哥，《星島》頭條個數字準唔準？」

「就我所掌握資料，應乘大八至十倍！肯定過千億元！數字絕非靠估，而是來自機密情報及臥底搜集。意即若非法賭注回流入馬會，最保守有多千二億元投注額，即二百幾億元稅款及善款！」

嘩嘩嘩，咁勁，點解警方唔空群出動拉人封艇呢？尤其如今趁歐國盃步入高潮，一網成擒啦！

「現代外圍佬相當狡猾，亦擅用最新科技，甚至加密數碼貨幣。兼且投注網站多設海外，用匿名伺服器，更有大量專家教路！」X哥逐一解釋，神情有點無奈：「仲有，外圍佬因唔使花行政費用、交稅及抽善款，純粹搭馬會開盤的『順風車』，故可以重重回扣畀賭仔！」

「咦，咁講法，是否無得破解？」

「咁又唔係！」X哥眼神凌厲謂：「第一，執法部隊要加緊掃蕩，不論外圍佬、駁腳艇仔或非法賭仔，一查到就拉。第二，立法從嚴，重重判罰。第三，政府略減賭博稅，讓馬會可以調高回扣畀投注者。三招落齊，必有效！」

賭仔幫襯外圍，冒犯法風險，點解？無非貪多點回扣，兼且諗住冇咁「好彩」畀人拉到。對症下藥，若正途回扣增加、被捕風險提高，個個識計機會成本，點會博坐監咁豬頭喎？

明天跑馬，頭場形勢最簡單。「蟲草成名」贏完一千米，換牌仔周俊樂，明刀明槍博減磅再冧莊，要！「有主意」出三次，兩次一千入位，路程專家，勿因莫雷拉唔騎而忽略，要！「加州星球」初出，全套訓練在從化做，試閘靚仔W出，又要。以上三隻，一於扑二重彩、Q及PQ啦！

曾智華

阿碌開咪