【阿碌開咪】由唔打到打咗

　人，一般都有羊群心態。投資如是，移民如是（上世紀八十年代最明顯，尤其藝人，唔移一移好似冇晒江湖地位咁款），理所當然，打疫苗也如是。

　　我有N個飯局群組，定期聚會分享美食、分享見聞，當然，也分享生活感受。

　　發覺，幾乎個個群組四個月前話題，只集中三個範圍：一、移唔移民；二、打唔打針；三、裝唔裝安心出行。

　　當時，三條問題超過七成答案為：一、都要諗諗嘞；二、唔打！都唔知有乜反應；三、唔裝！為乜要畀政府知我去過邊度喎，毫無私隱！

　　三條問題，四個月前我的答案：一、唔移！移過一次就知自己有幾「嘟」鍾意香港。移民於我就似鹹水魚跌入淡水湖，好快窒息而死！二、可打即打。因睇唔到人人唔打的話，社會如何能夠回復正常。對，打疫苗可能有副作用，但衡量保護自己保護他人，加上，所有疫苗都要由「志願者」先行先試，我願接受！三、唔裝，嫌煩兼有多少反叛心態。

　　好嘞，四個月後又如何？結果，答案由七三比變三七比。個個慢慢改變看法與態度，羊群效應出現。

　　如今，同是那N組人，七成答案係點呢？一、諗落都係唔移民嘞。中美交惡升級，費事去到西方世界畀鬼佬仇視啦。又唔知有冇野做，睇定啲先嘞；二、打咗喇，唔打又驚自己領野，更驚傳畀家人，打咗復必泰嘞！

　　安心出行又如何？小弟聲明，我已轉軚請肥妹老婆同我Download咗。因為，第一、出出入入填紙仔，煩到抽筋。

　　第二、其實，若唔想畀人知去過邊容乜易啫，唔「嘟」咪得囉——有得揀，先至係老闆！

　　若我的「飯局組」反映大部分心理取態的話，移民、打針及安心出行三大問題，應接近塵埃落定矣（必須聲明，我的全部是「老是佛」人馬！）。香港人，大把野玩，下次「羊群」玩乜？應該玩選立法會及向特首人選表態嘞（冇得選都要發聲！），且看結果又如何？

曾智華

阿碌開咪