【阿碌開咪】食到三高通波仔

不認不認還須認，谷針就是谷針。光明正大一齊谷，唔使遮遮掩掩！

　早前信和集團及華人置業率先公布，捐出千萬港元新樓抽獎幫谷針。我一睇，嘩，各大地產商今次肯定要飛身跟上，以免執輸行頭。你知啦，政治正確野唔肯做，後果可能會……心照啦，冇人講明嘅。你在需要時幫政府一尺，日後隨時會有人幫返你一丈，正是禮尚往來，大家識做。

　　果然，各大集團排隊湧出。包括華懋集團、香港總商會、國泰航空、莎莎集團……肯定陸續有來兼鬥「大」！

　　講，就個個百萬千萬元咁送，其實荷包兜肚，送一千萬元出去，限定得獎者幫襯返我，七除八扣，可能只捐三兩百萬元已掂。呢個，電視台做「巨獎」節目，贊助商大大聲公布送出商品幾多千元、幾多萬元，實質佢成本隨時兩折搞掂，即可換來雷霆宣傳。

　　睇睇谷針獎品，都幾搞笑，尤其全年自助餐任食！喂，老友，我成日強調李天命名句——多見生厭，意即你一定要與你喜愛的人、事、物，保持適當距離，製造期待感、馨香感，否則必出現反效果，由喜愛變厭惡。舉例，你狂喜歡歎拖羅，但若要你早午晚三餐，日日食，月月食，好快你一聽見拖羅兩字或諗起拖羅陣味已想嘔，一旦產生厭惡感，呢世可能都唔敢再接近了。

　　一年任食自助餐？怕且中獎者起初會貪心大食特食，到一星期後，可能已頂唔順。兩星期後，一定開始驚！未識驚？咁繼續狂食啦，好快糖尿病及三高將一齊殺到。再食落去，預備幾十萬元通波仔可也！

　　谷針大抽獎策略，又的確有效。我前星期到何文田體育館打第二針復必泰，下午四點，非常寧靜少人。哈，公布有樓抽、有自助餐、飛行哩數、Staycation……等着數後，上周五在同一時間到同一中心，已見幾乎坐爆！點到你唔服？

　　谷針送大禮，肯定再創高峰。希望快點谷到五百萬針，開始有群體免疫，齊齊除口罩啦！

曾智華

阿碌開咪