【阿碌開咪】牛津畢業唔識英文

2021-06-07 08:35

人生,乃一場馬拉松賽,又似賽馬跑大長途。即係點?即係率先彈出放領的,通常入直路就腳軟,然後散晒,被後面成棚馬趕過。

  就小弟觀察,中小學時的優異同學,多數直入大學,然後做專業人士,順風順水。不過,絕少需要受「森林定律」考驗,多數人靠佢,甚少佢靠人,故此,去到中年時仍非常「賴依芙」,除自己專業範圍事物外,其他一概不知。

  唔使睇遠,睇睇我哋特首就知,精英學生,精英政務官,早早有宿舍、秘書、司機、官家車、超大辦公室、薪高糧準。

  呢類人物,點會知道世界艱難與人間疾苦?因從來冇機會過草根生活,當然「離地」,故批評佢之聲不絕於耳。

  正常人,理應在跌跌撞撞中成長,在「真實世界」打滾,再慢慢向上晉升,這類人物才會有扎實根基。

  昨晚與香港最大集團(超過一半市民用到佢旗下商品)總裁L晚餐,佢正正慶幸自己中大學成績皆麻麻。雖有機會主修會計學系,但因並非出身名校,CV唔靚,畢業後唔夠人爭,於是只好加入二、三綫會計師樓。

  公司細,分工不精,乜都要做,結果乜都學到。不止,基於學歷不佳,更知若要出人頭地,必須發憤,不停進修外,更以工作態度取勝。終於,慢慢被老闆欣賞,變成公司重點栽培的高質馬。更勁,搏殺時,人人唔肯駐內地工作,L哥率先舉手。就此,中國經濟起飛,佢仕途同時起飛。就似人生大賽開始轉入大直路,逢馬過馬。如今,昔日同佢一齊畢業的會計師同學,全部畀佢彈離矣。

  L哥又講個笑話我聽:「香港有個大集團,主席選CEO好怪雞,專請名校渣斗學生。幾年前請咗個牛津大學畢業生,見工時,發覺對方英文水蛋,立即請!點解?主席睇法——咁屎英文都可以牛津畢業,必有特異武功!結果,中!原來此君只是英文渣,但腦筋靈活,公關交際勁強。集團在佢領導下,業績嘭嘭聲。

曾智華

阿碌開咪

關鍵字

最新回應

關鍵字
You are currently at: std.stheadline.com
Skip This Ads
close ad
close ad