【阿碌開咪】良禽擇木而棲

近半年，香港有個難以解釋的怪現象，唔多合邏輯，但事實則擺在眼前。

乜呢？正是在移民潮不斷湧現，經濟尚未復原，失業率仍然高企的情況下，樓價竟然繼續升呀升。

大家認識的年輕中產，總有十個八個家庭已經或正在部署移民。呢支大軍，冇十萬都有八萬啩，部分有自置物業，理應要拋售才夠錢移民者，但點解個市唔跌？

新樓更搶手得誇張，喂，疫情仲未過喎！

會唔會有啲現象，我哋唔知的呢？例如，大家只睇到不少人移民走，究竟可有香港人回流呢？

我冇數字，唔知。只知有位多年老友「大木」，正是如此，佢話回港乃「良禽擇木而棲」喎。

多年冇見，約晚飯，之前大家有默契，唔好拗政治！點解？因「大木」看法有如大量早早移民美加澳的香港人，雖然早早「投奔自由」，變晒美國、加拿大及澳洲人，但奇，竟冇幾多個認同西方價值觀，反之，全部支持中國共產主義。

呢班外國人，點解會咁矛盾的呢？我也曾居住美加，小小觀察。呢群香港老移民，當年走並非諗住「愛」落籍的國家，而是十之八九為搵食或「買個保險」。不過，去到外地，才發現「人哋嘅國家永遠係人哋嘅國家」，當地人，尤其美國人，一定歧視有色人種。

近年中國國力崛起，老移民心態——「我哋終於強大起來了」！這個「我哋」本與自己外國人身分直接衝突，但大家心底皆知，自己點可以真正「變籍」，又或人哋會真心接受你「變籍」呢？移民海外者認中情感特別強烈，可以理解。但發展到與香港不少主流意識「水火不容」，則未免令人有點意外。

回說「大木」回流。「你知我知，中美關係緊張，勢必升級。美國佬當然繼續妖魔化中國人，住在當地，愈來愈危險！我既認同中國，又覺得香港安全，咪全家移返嚟，遲下再上大灣區搵食囉，肯定掂過碌蔗！」

至於佢仲做唔做「美國人」，免問，費事反面！