【阿碌開咪】飲食業MM聲合理

2021-06-10 11:22
廣東俗語真係好,易寫又到肉,尤其好多本來粗粗哋,但一扭轉下諧音,大家明之餘,也有原本的神韻,替大家紓解情緒。

  俗語因應時代不同演變,小弟早年管電台,有一本不明文手冊,指出邊啲形容詞可以講、邊啲屬禁忌。但發展下去,禁忌,也變可在電台隨口講而冇人投訴了。

  上世紀七十、八十年代,有乜係禁忌語呢?例如吹脹、無厘頭、大檸樂、MM聲、頂你個肺……

  後來,群眾語言價值觀及道德界綫一路變,變變下,上述形容詞已可出街,當然最好睇下出自哪類形象主持人的口。例如,出自黃霑及黃毓民,聽眾容忍界綫會闊得多。

  講返今日主題,MM聲,唔使解釋嘞。香港人近兩年,無論貧富、顏色、上至高官、下至草根,有邊個冇在口中或心中講過吖?

  小弟接觸飲食業最多,近排從佢哋口中聽得最多MM聲。點解?因覺畀政府的混亂又欠邏輯防疫政策玩死。個個根本唔明點解會推出「離地到爆」又難以執行的玩法。最多人M的,為ABCD區設計。

  其實瘀爆,政府設計出呢幾區,原來純憑空想像。尤其D區,根本難以落實。

  「碌Sir,唔該你反映一下,我哋點解搞唔到D區,因分分鐘煩到抽筋兼中招!」一個餐飲業大集團CEO「大E」苦水滿肚。

  佢一講,我即明!

  第一,規定客人要先打針。主人家點可以咁要求?第二,有冇真係打針,由誰負責Check?主人家?若由經理孭這個責任,查錯咗點搞?畀客人玩、誤導又點搞?第三,員工一定要先打兩針。當訂滿晒酒席時,突有幾個「兩針人」請假、曠工、辭職……點搞?第四,酒樓員工相當大部分為兼職,誰會願意為開一兩日工打兩針?第五,若負責D區員工發生任何失場事件,是否立即要客人十點前疏散?臨急趕客變C區?換枱變B區?

  政府呢個政策,完全唔Work,得啖笑,咁當然由設計者搞返掂佢,這是高官的責任!

曾智華

阿碌開咪

最新回應

熱門文章