【阿碌开咪】饮食业MM声合理

广东俗语真系好，易写又到肉，尤其好多本来粗粗哋，但一扭转下谐音，大家明之馀，也有原本的神韵，替大家纾解情绪。

　　俗语因应时代不同演变，小弟早年管电台，有一本不明文手册，指出边啲形容词可以讲、边啲属禁忌。但发展下去，禁忌，也变可在电台随口讲而冇人投诉了。

　　上世纪七十、八十年代，有乜系禁忌语呢？例如吹胀、无厘头、大柠乐、MM声、顶你个肺……

　　后来，群众语言价值观及道德界綫一路变，变变下，上述形容词已可出街，当然最好睇下出自哪类形象主持人的口。例如，出自黄沾及黄毓民，听众容忍界綫会阔得多。

　　讲返今日主题，MM声，唔使解释嘞。香港人近两年，无论贫富、颜色、上至高官、下至草根，有边个冇在口中或心中讲过吖？

　　小弟接触饮食业最多，近排从佢哋口中听得最多MM声。点解？因觉畀政府的混乱又欠逻辑防疫政策玩死。个个根本唔明点解会推出「离地到爆」又难以执行的玩法。最多人M的，为ABCD区设计。

　　其实瘀爆，政府设计出呢几区，原来纯凭空想像。尤其D区，根本难以落实。

　　「碌Sir，唔该你反映一下，我哋点解搞唔到D区，因分分钟烦到抽筋兼中招！」一个餐饮业大集团CEO「大E」苦水满肚。

　　佢一讲，我即明！

　　第一，规定客人要先打针。主人家点可以咁要求？第二，有冇真系打针，由谁负责Check？主人家？若由经理孭这个责任，查错咗点搞？畀客人玩、误导又点搞？第三，员工一定要先打两针。当订满晒酒席时，突有几个「两针人」请假、旷工、辞职……点搞？第四，酒楼员工相当大部分为兼职，谁会愿意为开一两日工打两针？第五，若负责D区员工发生任何失场事件，是否立即要客人十点前疏散？临急赶客变C区？换枱变B区？

　　政府呢个政策，完全唔Work，得啖笑，咁当然由设计者搞返掂佢，这是高官的责任！

曾智华

阿碌开咪