【阿碌開咪】疫情帶動生意急升

2021-05-06 08:19
世事萬物,絕大多數可兩面看,且甚多是矛盾及相對的。例如有黑才有白、有甜才有苦、有危才有機。

  疫情年幾前殺到,大部分人叫苦連天。尤其做遊客生意的,無論航空公司、酒店、名牌銷售……皆蝕到眼光光,慘過飲咗有毒豬肉湯!

  是否各行各業皆大大鑊呢?又唔係,例如網購就掂到飛起。早前王維基隻香港電視炒到天咁高(如今已回調),市值曾經巴閉過TVB。另外,外賣集團也是掂過碌蔗。

  飲食業是否快氣絕?原來Yes & No!

  Yes的,多是老字號,養上百員工,租幾千至上萬方呎樓面的大型食肆,孭到眼凸,尤其冇晚市一輪,家家吊命。

  No的又如何?原來當大量餐廳執笠時,另一批生力軍,趁業主減租,舊鋪有齊飲食牌及廚房樓面設備,不少年輕人夾分開鋪!小弟幾個世侄,正是有心有力有火肯砌,早年試一家執一家,但取得寶貴經驗後,終摸清竅門,試出彩虹。其中最掂一家只二十個位,月租四萬五千元,每日外賣連午、晚兩段時間,可做一萬元至萬二元生意,一個月平均收入三十萬元。減晒所有支出,最少有十萬元利潤!於是同一模式,開完一家又一家,已開到第四家,全部賺錢!

  另外,昨晚與電器大王「老爺張」晚飯,佢又話:「碌Sir,發夢估唔到,一個新冠肺炎,令我生意升咗兩成過外!」

  「吓?咁神奇?咁就叫多隻吉品鮑歎喇!」我講下笑。

  「因為疫情發生,大部分人困在家,所以,全部家庭電器皆突然變得暢銷,包括電飯煲、麵包機、攪拌機等。其次,所有商場、食肆甚至家庭都搶購消毒機、空氣清新機,仲有……」

  「老爺張」一講起生意就眉飛色舞:「仲有,個個怕染毒,不少寧在家中剪髮,於是剪髮器又大賣。另外,人人想打疫苗,又驚血壓高,急急買血壓器日量夜量,真係多多都唔夠賣!鬼諗到一個疫情會帶來咁多生意咩!感謝上天,飲杯!」

曾智華

阿碌開咪

最新回應

關鍵字

熱門文章