【阿碌開咪】轟你唔使擇日子

老友「總裁S」好過癮，凡飯聚，必有江湖笑料之餘，也擅長自我幽默。

　　「碌Sir，你咪睇我做大集團CEO好巴閉咁款，其實，世界上有兩個人，省我唔使理由，又唔使擇日子㗎！哈哈哈！」

　　「S哥，你貴為明星級總裁，邊個敢省你呀？仲要唔使擇日，唔使理由？唔……估到嘞，第一個，大家係男人小丈夫，當然知，正是老婆大人，中唔中？」

　　「全中，飲杯！」佢將杯拉弗格聲飲光。「咁，另一個呢？吓？」

　　「……」我諗極都諗唔到邊個可以咁惡！

　　「嗱，證明你未做過商界，亦未做過高層啦！呢個，正是年年出幾千萬薪金加花紅畀你嘅大老闆呀！咁鬼高人工，有一半係『發泄費』！講得衰啲，係『侮辱費』呀！」

　　S哥指，大老闆鬧你，絕對唔使擇日子，亦一定搵到理由。若顧下你顏面嘅，就喺大班房或高層會議中省。不過，也有絕對唔畀面的，就在公開場合，甚至傳媒訪問中踩到你飛起。點解今日記起以上一段酒後真言？因前天早上，歎歎吓香滑奶茶，手機突然彈出S總裁訊息：「碌Sir，快啲睇《星島日報》A3版，震撼性新聞呀！」

　　火速揭！哎呀，今鋪TVB高層真係大杯檸檬可樂嘞。因公司最大股東黎瑞剛，擺明吼準對家ViuTV五周年台慶大日子出招，踩到自己公司管理層變地底泥，真係劍劍封喉！罪名包括：山頭林立、創新乏力、全面老化、迷失十年、遠離年輕人、決策失誤、亂買債券……總括一句就是——不滿意、不滿意、非常不滿意！嘩，咁樣公開狂砌，TVB老總李寶安點反應呢？返工又點面對同事呢？

　　「中國梅鐸」黎瑞剛絕非簡單的人，今勻出招，當然計好晒數，並有後着。TVB大地震肯定立即開始，高層冇得唔大換班矣。不旋踵，另一明星CEO阿C又來訊：「難明呀，碌Sir，邊有大集團老闆會公開狂砌管理層㗎？出問題，難道唔關佢事？以後邊個敢打佢工？」

曾智華

阿碌開咪