【阿碌开咪】轰你唔使择日子

老友「总裁S」好过瘾，凡饭聚，必有江湖笑料之馀，也擅长自我幽默。

　　「碌Sir，你咪睇我做大集团CEO好巴闭咁款，其实，世界上有两个人，省我唔使理由，又唔使择日子㗎！哈哈哈！」

　　「S哥，你贵为明星级总裁，边个敢省你呀？仲要唔使择日，唔使理由？唔……估到嘞，第一个，大家系男人小丈夫，当然知，正是老婆大人，中唔中？」

　　「全中，饮杯！」佢将杯拉弗格声饮光。「咁，另一个呢？吓？」

　　「……」我谂极都谂唔到边个可以咁恶！

　　「嗱，证明你未做过商界，亦未做过高层啦！呢个，正是年年出几千万薪金加花红畀你嘅大老板呀！咁鬼高人工，有一半系『发泄费』！讲得衰啲，系『侮辱费』呀！」

　　S哥指，大老板闹你，绝对唔使择日子，亦一定搵到理由。若顾下你颜面嘅，就喺大班房或高层会议中省。不过，也有绝对唔畀面的，就在公开场合，甚至传媒访问中踩到你飞起。点解今日记起以上一段酒后真言？因前天早上，叹叹吓香滑奶茶，手机突然弹出S总裁讯息：「碌Sir，快啲睇《星岛日报》A3版，震撼性新闻呀！」

　　火速揭！哎呀，今铺TVB高层真系大杯柠檬可乐嘞。因公司最大股东黎瑞刚，摆明吼准对家ViuTV五周年台庆大日子出招，踩到自己公司管理层变地底泥，真系剑剑封喉！罪名包括：山头林立、创新乏力、全面老化、迷失十年、远离年轻人、决策失误、乱买债券……总括一句就是——不满意、不满意、非常不满意！哗，咁样公开狂砌，TVB老总李宝安点反应呢？返工又点面对同事呢？

　　「中国梅铎」黎瑞刚绝非简单的人，今匀出招，当然计好晒数，并有后着。TVB大地震肯定立即开始，高层冇得唔大换班矣。不旋踵，另一明星CEO阿C又来讯：「难明呀，碌Sir，边有大集团老板会公开狂砌管理层㗎？出问题，难道唔关佢事？以后边个敢打佢工？」

曾智华

阿碌开咪