【阿碌開咪】雞飛蛋打兩場空

理性傳媒訓練，切忌偏看及偏聽就下結論。我的做法，每朝買齊左中右報章（支持報業），一字排開，就每個論題逐張睇，新聞睇完睇評論，收集觀點，再作分析。

例如近期鬧哄哄的「H&M事件」，小弟一睇，已覺極之情緒化，一定是兩敗俱傷，冇人得益，所有人受害。

以北京領導人的精明，肯定不會在此時與歐美各大製造商開打貿易戰，不過，基於「新疆棉」事件，不能不表個態，讓國人消消氣。

點搞？香港人十之八九不理解中南海領導人心意，而內地呢，十四億人之中，相信亦有十二、十三億摸不透。於是，「H&M事件」本來只是找個小小歐洲品牌，輕輕打兩拳表態，點知一出拳，又冇講明幾大力，下邊班網紅、藝人，以至香港的愛國政黨及建制議員，包括葉劉淑儀等，為「表忠」，飛身而出。結果，不只打一個品牌，大鑊！變成幾乎所有歐美名牌皆掃場！

這就似本來動機是點根火柴，燒下手指，略作威嚇，點知你點火柴，旁邊班嘍囉一哄而上「淋火水」！結果變成火燒山！

少數內地有料評論員分析及預測，中央必定會很快出動全國「消防車」救火。

點解？原因如下：

一、北京冬奧已殺到埋身，必須各國畀面派出運動員外，大會更已簽下巨額贊助費及廣告費合約，全屬歐美頂級運動品牌。若如今你同成班「米飯班主」翻臉，佢哋一旦抗議杯葛唔玩，咁成件國際盛事點搞？好易冇晒面㗎喎！

二、眾所周知，中國乃「世界工廠」，超過一半全球頂級運動服裝在內地設廠。整個製造養活幾百萬工人，相連之下，也養活百萬計家庭。若歐美服裝集團畀你逼到冇晒癮撤資，咁成千萬計國民生活點搞呢？

三、中國製的歐美名牌，出口佔六成以上，每年創匯是天文數字。你同佢哋割席，等於倒自己米！

內地術語——雞飛蛋打兩場空，準確形容這件可能令中國「人財兩空」的事件。

曾智華

阿碌開咪