星島日報

【阿碌開咪】最衰我唔識畫畫!

2021-03-01 11:00
天生我才皆不同,各具天分。我呢,早年已被長輩及老師「一錘定音」——死剩把口!

本來,此乃罵人句語,即乜都唔叻,淨識亂噏。哈,童年被罵時怎會知,此乃「入行指示」!尤其,到美國讀大學時,發覺香港學生十之八九怕羞,唔敢上堂問問題,只懂抄筆記。如此,小弟發達矣,因敢講敢問(唔理內容質素)。教授對呢個多口香港學生,立時另眼相看。尤其做GroupProject時,次次由我負責做Presentation,等於將同學集體心血攬晒上身,得分當然高晒。

「死剩把口」畢業後,神奇地,入咗香港電台。從此日日開咪,講足三十幾年,直至退休!

寫咁大段,因自覺不無遺憾。雖把口搵到食,但卻好多方面屬「白癡級」。例如數學、化學、物理……以至繪畫,成績皆「一敗塗地」!

其實,真的好想有丁點繪畫天分。因日常生活中見到非常多溫馨美麗境況,若我懂用畫筆記錄下來就好了。肯定幅幅含着人性中的光輝。當社會怨氣甚深,以為事事皆負面時,就讓我的畫筆,畫出真實的另一面好了。

有感而發,因睇到有個「共融香港」繪圖設計召集,希望收集有創意、有訊息的畫作,宣揚關愛及傷健共融。

我對此感受頗深,因家住附近,有一所社康中心,收容各類肢體傷殘、自閉及智障等等年輕人。而再走遠點,就是大型公共屋邨,也住着不少失明、聽障及肢體缺陷者。

以上人士走到街上,甚少可以全面照顧自己,故多由親友或導盲犬引領。輕微智障的,雖可自己乘搭交通工具,但仍要路人加以協助。

就此,我每天見到一個又一個「天使型」人物主動伸出援手協助所有傷殘者,扶上巴士或帶過馬路後就低調微笑離去。

這畫面若能畫出來放在媒體供分享,必可孕育出「共融香港」概念。你可以幫忙嗎?作品將有機會變成巴士廣告!詳情到《共融香港Facebook》閱覽!

曾智華

阿碌開咪

最新回應

關鍵字