【阿碌開咪】「蠢新聞」從天降

從事電台廣播及專欄寫作幾十年，不時有生張熟李問：「碌Sir，你日日講日日寫，邊有咁多題材㗎？有冇試過乾塘呢？」

小弟必笑笑口回應：「從來未試過噃。簡單，日日打開報章、上網及聽下睇下新聞，就有N咁多野可以畀我嘲笑、分析、抨擊……尤其公眾人物亂噏野及某啲愚蠢政策，好好『玩』㗎！」所以，我每朝必買齊全港幾份大報，在茶記邊歎多奶奶茶（滑好多），邊睇有乜笑料。

呢呢，最新鮮例子，前日就有單新聞在「報紙屁股」出現，真係笑死人冇命賠。

呢單，可稱之為「蠢新聞」，簡直從天而降畀我鋤，過足癮！

乜野咁蠢？正是環保署就「塑膠飲料容器生產者責任計畫」展開公眾諮詢，建議市民回收一個膠樽，可獲一毫子回贈。

初初睇到呢段報道，小弟以為自己眼花，於是除下眼鏡捽啊捽，肯定清楚再睇。唔……堅喎，真係「一粒神」（一毫子廣東話俗稱）喎。

咁就笑到噴奶茶啦。究竟環保署班高官知唔知今時今日一毫子有乜用呢？（答案：「冇！」 ）咁今時今日又有冇人想要一毫子呢？（答案又係：「冇！」唔該去街頭街尾街市檔口睇睇，全部唔收毫子！）呢個諮詢，真係離地到爆，唔知由邊個「天才」度出，幻想有任何市民會為一毫子山長水遠攞個膠樽（就算十個……一百個都唔會啦！）去回收，喂，講出嚟都畀人笑冇腦啦。

小弟百厭星上身，立即在自己的網上「粉絲頁」公布：「我決定在此實牙實齒公開承諾，邊個（最好環保署啦！）肯上門到舍下收玻璃/膠樽，我願出一百倍價錢，每星期十蚊雞！」

其實到過/住過加拿大、澳洲、台灣、日本……的香港人必知，垃圾分類，必須由教育及執法雙軌並行，才能建立一套文化，令人人遵守，長遠成功。

特區政府的廢物處理政策，窒下窒下，又怕癢，又怕痛，搞出個一毫子回收，唉……笑鬼死人冇命賠！

曾智華

阿碌開咪